Linog sa carcar

CEBU, Philippines - Pipila sa mga residente sa Dakbayan sa Carcar ang nakabatyag og hinay nga pagtay-og sa yuta atol sa 3.3 magnitude nga linog alas-8:12 sa miaging gabii.

Ang maong linog sumala pa sa Phivolcs ang epicenter naa sa Carcar ug tectonic ang origin niini. Aduna kini gilawmon nga lima ka kilometro gikan sa ibabaw.

Ang maong linog nakapaalarma sa mga tawo nga wala makalimot sa kahadlok dihang niigo ang 7.2 magnitude nga linog sa Central Visayas niadtong tuig 2013.

Nagbaha sa social media ang mga pangutana sa kadaghanan human niigo ang linog ug gisundan gilayon kini sa kusog nga unos sa hangin.

Matud pa ni Snow Agravante, usa sa mga residente sa Carcar   sa Banat News atol sa maong pag-uyog diha sila sulod sa usa ka mall, hinungdan nag-iyahay sila og dagan pagawas nga wala niya nabantayi nga nakabitbit siya og item.

Sumala pa ni Agravante, tungod kay sa iyang paglingi wala man iyang kapikas hinungdan nibalik siya sa agi aron sa pagpangita niini ug sa pag-uli ngadto sa house detective sa iyang nadala nga baligya. Dugang pa ni Agravante kalit kaayo ang maong linog ug daw murag gipangibot ang mga lansang sa haligi sa mall atol sa pag-uyog niini.

Wala hinuoy nadawat nga mga dagkong kadaut sa mga edipisyo o mga imprastraktura ang maong pagtay-og sumala pa sa Carcar Police atol sa maong linog.

Samtang sa Lungsod sa San Fernando, dul-an sa duha ka oras kapin nangatanggong ang mga sakyanan padung sa habagatan sa probinsya human usa ka dakong sanga sa kahoy nga Acacia ang nalamba sa dalan ug nadala ang linya sa kuryente.

Si Police Officer 1 Ronilo Lantip, Desk Officer sa San Fernando Police Station nga nahinabi sa Banat News mibutyag nga  nasakli ang sanga tungod sa kalit nga pag-igo sa unos pasado alas-8 sa gabii.

Gitug-an gawas sa sanga ug mga linya sa kuryente  wala nay lain pang kadaut nga gibilin ang maong aksidente.  Rowena D. Capistano(BANAT NEWS)