Peste moataki pagbalik sa umahan

CEBU, Philippines - Gipasidan-an sa Provincial Agriculture Office ang mga mag-uuma sa posibeng pag-ataki pagbalik sa dagkung dulon ug peste. Niadtong Hulyo ang mga Lungsod sa Daanbantayan, Pilar, San Francisco, Santa Fe ug San Remigio nideklara og state of calamity tungod sa pagpangataki sa peste sa mga umahan.

Ang hepe sa PAO nga si Dr. Roldan Saragena nibutyag nga sa nilabay’ng semana dunay gipahigayong training kabahin sa “management of special pest” lakip ang dulon ug army worm sulod sa lima ka adlaw sa Santa Fe nga giapilan sa mga lungsod nga naapektuhan kaniadto sa peste.  Kabahin sa training ang field work sa Daanbantayan ug nabantayan nga ang mga “locust” o dagkung dulon naa gihapon sa umahan.

Matud ni Saragena nga karong panahona “mating season” sa maong mga peste dayon sundan sa pagpangitlog sa mga baye ug mapusa dayon modaghan.

Ang mga dulon nga wala namatay sa pagbomba og pesticides naa kini magtago sa mga sagbot kilid sa umahan. Matud ni Saragena nga usa sa pamaagi sa pagsumpo sa dulon mao ang pagpangita sa itlogan aron kini mapuhag ug ang mga kilid sa umahan kinahanglan nga hawan. Ang pagbomba og pesticides katapusan na kining pamaagi kung moataki na gyud sa mga tanum ang mga peste.

Gawas sa Daanbantayan, ang mga Lungsod sa San Remigio, Medellin, Minglanilla, Dakbayan sa Naga ug Carcar, Lungsod sa Ginatilan ug Isla sa Camotes ang naproblema sab sa peste.

Gibutyag sab ni Saragena nga dunay usa ka ektaryang humayan sa Dakbayan sa Carcar nga naapektuhan sa “tungro” o sakit sa humay. Hinuon ang maong humayan insured kini sa Philippine Crop Insurance Corporation (PCIC). (BANAT NEWS)