Babayeng namaligya’g pekeng “Mighty” nga sigarilyo sikop

CEBU, Philippines - Mokabat ngadto sa 100 ka kahon nga giingong mga peke nga Mighty nga sigarilyo ang giembargo sa mga ahente sa National Bureau of Investigation (NBI) sa gihimo nilang operasyon sa milabay’ng adlaw.

Ang maong mga sigarilyo nasakmit sa NBI gikan sa tindahan sa usa ka Eva Auza nga nahimutang diha sa merkado sa Brgy. Poblacion sa Lungsod sa Moalboal.

Ang maong pagpangronda gipangulohan ni Atty. Wenceslao Galendez, Jr. dala ang search warrant nga giluwatan ni Presiding Judge Ramon Daomilas, Jr. sa Branch 11, Dakbayan sa Sugbo batok kang Auza.

Si Auza giingong nakalapas sa Section 155 in relation to Section 170 sa Akta Republika 8293 kon “The Intellectual Property Code of the Philippines”.

Ang maong pagpamaligya og peke nga sigarilyo giingong nakaapekto sa kompaniya sa nahisgutang sigarilyo.

Ang makalapas sa nahisgutang balaod mapasakaan og kasong sibil ug administratiba ug ang silot mao ang pagkapriso gikan sa duha ka tuig ngadto sa lima ka tuig ug makabayad og multa gikan sa P50,000 ngadto sa P200,000.

Ang saksi sa maong pagpangronda ang kagawad sa barangay nga si Joselito Edro ug ang representante sa Mighty Corporation nga si Ernie Lozada.  (BANAT NEWS)