Kapin P.5M shabu nasakmit

CEBU, Philippines - Nasikop sa kapolisan ang usa ka lalaki nga wanted sa kasong paghupot og drugas nga nakuhaan sab og kapin sa tunga sa milyon ka pesos nga drugas kagahapon sa udto sa Brgy. Kalunasan sa Dakbayan sa Sugbo.

Ang maong lalaki naila nga si Jerome “Jojo” Miñoza, nga numero uno sa priority list sa Regional Anti-Illegal Drugs Special Operations Task Group 7.

Sumala pa ni Senior Inspector Joey Bicoy sa RAIDSOTG7  nga nahinabi sa Banat News nasikop ang suspek pinasikad sa warrant of arrest nga gi-isyu ni Judge James Ramon Himalalon sa Branch 57 sa Cebu  City.

Matud pa niya nga nasigpatan ang suspek gikan sa Pulangbato sakay sa usa ka habal-habal maong gisundan kini sa operatiba hangtud sa Kalunasan diin aduna kini tawo nga gikatagbo aron sa pagkuha og shabu apan sa paglakaw niya og balik luwan og habal-habal gipara na siya sa mga polis ug gisikop.

Nakuha sa kapolisan ang napulo ka medium size packs nga shabu sa bulsa sa purol sa suspek nga gibanabanang P590 mil. Si Miñoza nga gisulayan og pagkuha sa Banat News og iyang habig igo lang miingon nga "no comment ko ana."

Sa laing bahin, lima ka gidudahang drug pushers apil ang usa ka dalagita ang nadakpan sa kapolisan sa Lungsod sa San Remegio ug Dakbayan sa Bogo.

Si Senior Police Officer 1 Wendell Pestaño sa San Remegio Police Station miila sa nadakpan sa Sitio Cogon, Brgy. Victoria mao sila si Marlou Joe Salimbot Yurag, 37, ug kauban niini nga 17 anyos nga dalagita.

Ang mga dinakpan nasakmitan sa kapolisan og unom ka gagmay nga paketeng shabu ug usa ka kalibre .45 nga armas ug bala.

Sa laing operasyon, tulo ang nasikop sa buy- bust operation sa kapolisan sa Dakbayan sa Bogo nga naglakip sa usa nga aduna nay pending nga kaso sa ilegal nga drugas sa korte.

Ang nadakpan mao sila Maxell  Noval, 23, Mark Samuel Ngujo Ramil, 26, ug  Bryan Ompoc Pialago, 26, nga dunay warrant sa kaso gihapon sa drugas ug pulos taga Brgy. Guadalupe, Dakbayan sa Bogo. Nasakmit gikan ni Ngujo ang usa ka medium size, 24 ka gagmay nga putos nga pulos may sud nga gidudahang shabu ug drug paraphernalia. (BANAT NEWS)