Way klase tungod sa IEC
CEBU, Philippines – Pipila ka eskuylahan sa Dakbayan sa Mandaue, Lapu-Lapu, ug Sugbo ang way klase tungod sa International Eucharistic Congress nga magsugod karong Domingo, apan adunay makeup classes nga bayad sa mga adlaw nga walay klase.
Matud sa Department of Education Cebu District head Bianito Bagat, adunay lima ka publiko nga tunghaan nga dili magklase og usa ka semana sama sa Mabolo Elementary School, Mabolo Day ug Night High School, Barrio Luz Elementary School, Barrio Luz Night High School, ug Carreta Elementary School na karon.
Sa Enero 25 hangtud 30, walay klase ang Abellana National School (Night) ug City Central School (Night). Ang Abellana National School (Day) ug City Central School (Day) walay klase sa Enero 29 ra.
Atol usab sa pagpahigayon sa Santos nga Misa diha sa Kapitolyo sa Enero 29, walay klase ang Ramon Duterte Memorial School, Guadalupe Elementary School, Tejero Night High School, Lahug Elementary School (Afternoon Session), Lahug Night High School kay sirado ang mga dalan diha atubangan sa Kapitolyo.
Ang mga tunghaan nga nagsuspenso sa klase pasumitiron og plano kalabot sa makeup classes aron makompleto ang 201 school days nga rekisitos sa DepEd.
Samtang ang mga pribado nga tunghaan gipadalhan og suwat ni Bagat aron sila maoy pabut-on kun ilang isuspenso ang klase.
Hinuon dili ang tanang miyembro sa Catholic Education Association of the Philippines (CEAP) ang walay klase.
Ang University of the Visayas dili usab magklase sulod sa usa ka semana human nipadala og memo si Executive Vice President Jose “Dodong” Gullas.
Samtang ang mga eskuylahan sa Dakbayan sa Mandaue gipadalhan na usab og suwat ni Schools Division Superintendent Arden Monisit sa pagpasuspenso sa klase sugod Enero 25 hangtud 29 tungod sa mamugna nga traffic, apan aduna silay makeup classes sa Pebrero 13, 20 ug 27 ug sa Marso 5 ug 12.
Ang DepEd Lapu-Lapu District walay klase sa tanan publikong tunghaan nga anaa sa mainland Lapu-Lapu ug ang tulo ka pribado nga tunghaan sulod sa usa ka semana. – /EIM) (BANAT NEWS)
- Latest
