Polis vs polis usa patay sa Bohol

CEBU, Philippines – Patay ang usa ka polis samtang angol ang laing usa human silang duha nagkapinusilay sulod sa kusina sa Sikatuna Police Station sa lungsod sa Sikatuna sa Bohol kagahapon sa buntag.

Ang namatay naila nga si Police Officer 2 Marlon Balbiran, 31, Tourist Police, nga nadestino sa Tarsier Sanctuary Corella, Bohol, samtang ang nakapusil kaniya mao si PO3 Al-Noel Felicia, 33, nadestino sa maong police station.

Samtang kinahanglan nga operahan si Senior Police Officer 2 Fidel Malig-on, 41, sa Gov. Celestino Gallares Memorial Hospital aron makuha ang tulo ka bala nga miigo sa iyang tiyan human siya gipusil ni Balbiran.

Si PO3 John Argie Plaza, imbestigador nga nahinabi sa Banat News miingon nga pasado alas-9 kagahapon sa buntag dihang miabot si Balbiran sa Sikatuna Police Station ug nangita kang Malig-on.

Kay polis man lagi si Balbiran gitug-anan kini sa kaubang polis ni Malig-on nga atoa  sa kusina ang iyang gipangita, apan sa pag-abli pa lang niini sa pultahan diretso niyang gitionan og armas si Malig-on dayong ingon: “ngano’ng gipaka-uwawan nimo akong pamilya?’” dayong pusil sa   tiyan ni Malig-on ka tulo ka higayon.

Si Felicia nga nakadungog sa butobuto midagan padulong sa kusina ug nakit-an pa niya nga nagtion pa sa iyang armas si Balbiran.

Sumala ni Plaza nga giingnan ni Felicia si Balbiran nga hunongon ang iyang gibuhat apan siya na man hinuon ang giatubang niini ug gipabuthan hinungdan nga mibawos pagpabuto si Felicia kang Balbiran ug naigo kini sa iyang ulo.

Gidala dayon si Balbiran sa Gov. Celestino Gallares Memorial Hospital apan gideklarar nga dead on arrival. Samtang si Malig-on unang gidala sa Holy Name University Medical Center Inc., apan gibalhin sa tambalanan diin gidala si Balbiran aron operahan  tungod sa niungot nga mga bala sa lawas niini.

Samtang si Felicia gipaubos og paraffin test ug gipadala na sa Camp Dagohoy, Bohol Police Provincial Office Headquarters alang sa imbestigasyon. Nasayran nga ang duha managsilingan  sa Barangay Oy, Loboc, Bohol. Dugang imbestigasyon ang gipahigayon sa kapolisan sa Sikatuna, Bohol sa maong hitabo.  – /EIM) (BANAT NEWS)