Asa ang mga gwardiya?
CEBU, Philippines – Nangita karon si Konsehal Danny Caballero sa siyudad sa Talisay kun hain na ang mga gwardya sa Talisay City Hall nga aduna man untay pundo nga giaprubahan alang sa ilang suholan.
Matud pa niya ilang gipalabang ang supplemental budget-no. 2 nga kalakip niini ang P4.5 milyones nga alang sa pag-hire sa mga blue guards niadto pang buwan sa Hunyo. Matud pa ni Caballero nga niduso na lang og ika-upat nga supplemental budget ang mayor apan walay gwardya nga nagtikawtikaw sa city hall.
Si Budget Officer, Edgar Mabunay kinsa mao usab ang chairman sa Bids and Awards Committee (BAC) nipasabot sa mga tigbalita nga naka-bidding na sila ug upat ka mga security agency ang nangapil.
Sigun pa niya dili madali ang proseso sa pag-hire og security agency ug naabtan pa usab sila sa bag-ong usbaw sa suholan nga P13 nga gimando sa Department of Labor and Employment (DOLE-7).
Gumikan niini adunay mga kausaban nga gipresentar ang mga security agencies maong nalangay ug nadesisyonan nga sa sunod tuig na lang sila mokuha og gwardiya kay apiki na sa panahon.
Gipasalig ni Mabunay nga ang P4.5 milyones nga budget wa hilabti ug malakip na kini sa savings sa 2015. Si Caballero mituki niini tungod kay nagsige og yawit ang mayor nga gilaslasan ang budget apan dihang gihatagan kini sa pundo nga gipangayo wala ipatuman ang proyektong gitagan-an sa pundo. – /EIM) (BANAT NEWS)
- Latest
