Masuso gikawat o gibaligya?

CEBU, Philippines – Gipalawman karon sa kapulisan ang imbestigasyon sa kaso bahin sa gikatahong pagkawat sa usa ka 3-bulan pa lang nga masuso diha sulod sa Cebu South Bus Terminal.

Kini human nga adunay mga nagduda sa pangangkon sa inahan sa bata nga gikawat ang iyang anak sa usa ka babayeng nagpakaaron-ingnong nagpaabot sa bana nga usa ka konduktor sa bus.

Matud pa ni Van Derrick Gestopa, operator sa close circuit television (CCTV) sa CSBT dili siya makatuo sa pangangkon sa inahan sa masuso nga si Maricel Enriquez.

Sumala pa ni Gestopa, base sa kuha sa CCTV mabantayan nga dul-an 30- minutos pa ang milabay sukad nga nilakaw ang babaye ayha pa nagsugod og pangita ang inahan.

Nakita usab sa video nga nagtabi ang duha sa wala pa mibiya ang babaye ug gani aduna pay duha ka polis sa luyo sa duha.

Usa sa mga dispatser sa terminal nga si Ramil Sato nga nakakita usab sa babaye dili katuo nga gikawat ang bata.

Matud niya, nipalit siya og sigarilyo kang Enriquez niadtong tungora ug nabantayan niyang nakigtabi kini sa babaye nga nagkugos sa iyang anak.

Makita usab sa video nga gitunolan og bag si Enriquez ug dayon nilakaw ang babaye dala ang anak niini.

Apan sa interogasyon sa kapulisan sa inahan kini miingon nga gihatag sa babaye kaniya ang bag kay adunay Ceres bus nga miabot ug miingon daw kaniya ang babaye nga naabot na ang iyang bana.

Gusto daw unta niya nga kuhaon ang iyang anak apan miingon ang babaye nga mobalik ra kini apan wala na kini mobalik pa.

Apan ang igsuon ni Maricel nga si Rebecca Andales mipadayag nga dili kini mahimo sa iyang igsuon nga ibaligya ang anak. Adunay lima ka mga anak si Maricel sa managlahing mga lalaki, usa kanila Amerkano, matud niya kung tuyo pa niining mamaligya og anak, kadto na lang untang anak sa igsuon nga Amerkano og liwat nga kaniadto gihangyo nga paliton og P50 mil.

Ang hepe sa Criminal Investigation and Detection Group-7, Supt. Marlon Tayaba miingon nga ilang palawman ang  imbestigasyon human nga nihimakak si Enriquez nga gibaligya niini iyang anak. – /EIM) (BANAT NEWS)