Gisampalong sa kapuyo napangag

CEBU, Philippines – Napangag ang usa ka babaye human naigo sa sampalong sa iya’ng kapuyo nga nadakpan sab sa amahan sa babaye nga nakakita sa ila’ng panag-away pasado ala-una sa niagi’ng hapon sa barangay Poblacion, Pilar, isla sa Camotes.

Natanggong pa sa prisohan ang 34-anyos nga seaman human gipapriso sa tanod nga amahan sa iya’ng 21-anyos nga kapuyo.

Si SPO2 Dante Wenceslao, OIC sa Pilar Police Station, niingon nga naabtan sa amahan sa babaye nga nagkagubot ang duha. Apan wala siya ka-agwanta sa pagkakita niya nga napangag ang iya’ng anak hinungdan nga gidakop ang kapuyo.

Matud ni Wenceslao nga gipaak sa babaye ang tudlo sa seaman mao’ng iya’ng gibunlot tungod sa kasakit.

Mikisi-kisi og maayo ang lalaki apan dili man gyud mamuhi ang babaye hinungdan nga iya kini’ng gibunlot.

Apan nisamot og paak ang babaye mao’ng nasampalongan siya sa kapuyo nga niresulta sa pagkapangag niini.

Ang tanod nga amahan sa babaye nga nagtan-aw sa nahitabo mao na’y nangunay og sikop sa lalaki ug nihatud ngadto sa karsel sa Pilar Police Station.

Nakaangkon og pangos ug bun-og sa iyang lawas ang babaye ug karong adlawa i-endosar sa Municipal Social Welfare and Development Office ang kaso.

Posible’ng mag-atubang og kaso’ng serious physical injury in relation to violence against women and their children act ang seaman. – /GMR) (BANAT NEWS)