LP, Alayon sa Carcar gi-endorso ni Davide
CEBU, Philippines - Pareho’ng gi-endorso ni Gobernador Hilario Davide III ang magkaatbang nga Liberal Party ug Alayon Party sa dakbayan sa Carcar.
Si Bokal Raul Alcoseba ang opisyal nga kandidato sa LP sa pagka-mayor samtang si Mayor Nicepuro Apura sa Alayon Party kinsa nisaad og suporta nila’ng Davide ug Bise Gob. Agnes Magpale ingon man nila’ng Mar Roxas sa pagka-presidente ug Kong. Leni Robredo sa pagkabise-presidente.
Una na nga giisa ni Davide ang mga kamot sa grupo ni Alcoseba sa Kapitolyo sa niagi’ng semana.
Hinuon dili si Kong. Gerald Anthony “Samsam” Gullas, Jr. sa Alayon ang suportahan ni Alcoseba sa pagka-kongresista kun dili si San Fernando Mayor Antonio Canoy kinsa orihinal nga sakop sa LP.
Si Canoy nagpasakop na lang sa Nationalist People’s Coalition (NPC) gumikan sa pagbabag ni Gullas nga mahatagan of certificate of nomination and acceptance (CONA) sa LP.
Si Alcoseba nagkanayon nga alang kaniya ang labi’ng importante nga siya ug ang iya’ng slate ang gihatagan og CONA sa LP ni Davide nga mao’y provincial chairman sa partido.
Matud ni Alcoseba nga bisan kinsa pa ang i-endorso, panahon sa adlaw sa piniliay ang katawhan sa Carcar ang magbuot kung kinsa’y ila’ng pilion. Si Alcoseba niklaro nga wala siya nahiubos kang Davide.
Pasabot ni Alcoseba nga ang gobernador usa ka “good soldier” nga igo lang nisunod sa mando sa iya’ng labaw. (BANAT NEWS)
- Latest
