Comelec sa Talisay bantayan sa kapolisan

CEBU, Philippines – Sugod ugma’ng adlawa, mobutang og pwersa sa kapolisan si Supt. Germano Mallari sa buhatan sa Commission on Elections sa dakbayan sa Talisay atol sa una’ng adlaw sa pagduso sa certificate of candidacy.

Si Mallari nga mao’y hepe sa kapolisan nipahibawo nga ang iya’ng sakop mao’y motabang sa pagseguro nga hapsay ug malinawon ang pagduso sa mga kandidato sa ila’ng COC. Iya’ng palikayan ang mga supporters sa mga kandidato nga magsinggitay ug mohimu na hinuon og kagubot.

Hinuon iya’ng gipahimangnuan ang iya’ng mga sakop nga pabiling neutral ug wala’y labanan nga politiko aron patas ang ila’ng trabaho.

Sa nasayran, si Senior Supt. Noel Gillamac, director sa kapolisan sa probinsya sa Sugbo, ang nipahimangno sa iya’ng mga sakop nga magpabiling neutral sa trabaho ug dili molaban sa bisan kinsa nga politiko aron dili sila maapeke sa ila’ng trabaho.

Samtang si Mallari nidugang nga hangtud gyud sa katapusang adlaw sa pagduso sa COC niya ibutang ang iya’ng sakop sa Comelec.

Human niini ibalhin niya sa Oktubre 17 ngadto sa 31 sa Gaisano Fiesta Mall sa Tabunok tungod sa ipahigayung off-site registration sa Comelec.

Iya’ng panghinaut sa mga politiko nga mogiya sab sa ila’ng mga supporters nga dili momugna og kasamok aron hapsay ang Talisay. - /GMR) (BANAT NEWS)