3 ka polis naaksidente

CEBU, Philippines – Tulo ka mga polis ang nalandig sa tambalanan human nakasugat og managlahing aksidente sa dakbayan sa Sugbo niadtong nakalabay nga adlaw.

Pasado alas 8 sa buntag, duha ka mga polis nga gikan nag-duty sa kalihokan sa Asia-Pacific Economic and Cooperation (APEC) Summit nga nadestino sa Naga City Police ang naaksidente sa eskina Maria Gochan ug N. Bacalso Avenue human mibangga ang ilang motorsiklo sa usa ka taxi nga paingon moliko.

Ang duha ka mga polis mao sila si Police Officer 1 Diosdado Namang ug ang iyang backrider mao si Police Officer 1 John Mark Bongo nga pulos nakaangkon og mga bun-og sa kalawasan.

Samtang ang drayber sa taxi naila nga si Baring Paypa, 46, nga taga Upper Mohon dakbayan sa Talisay.

Sa imbestigasyon nga gihimo sa Traffic Patrol Group nga gipangulohan ni SPO1 Dionisio Galo, nagsubay sa N. Bacalso Avenue ang motorsiklo nga gisakyan sa duha ka polis apan pag-abot sa maong dapit kalit lang miliko ang taxi hinungdan nga nagkasungag ang duha ka sakyanan.

Ang duha gidala sa Chong Hua Hospital samtang wa ra maunsa ang drayber sa taksi. sumala pa ni Senior Police Officer 2 Anthony Deligero sa TPG.

Samtang pagkahapon sa mao gihapong adlaw, naangol si SPO2 Miguel Enriquez, sakop sa Pardo Police Station human nadasmag ngadto sa usa ka trisikad nga gimaneho ni Marvin Romo nga dunay kargang bottled water diha sa Poblacion Pardo dinhi sa siyudad sa Sugbo.

Matud pa ni Senior Police Officer 1 Ramil Yncierto sa TPG nga nahinabi sa Banat News mitabok sa dalan ang trisikad ug wa mabantayi ni Enriquez hinungdan nga iya kining nabanggaan hinungdan sa pagkasukarap sa maong polis ug nalagpot sa karsada si Romo.

Ang duha gidala sa Cebu City Medical Center  (CCMC) ug nakagawas ra ‘sab dayon. – /EIM) (BANAT NEWS)