Misuway’g sanggot sa polis napatay

CEBU, Philippines - Usa ka 30 anyos nga lalaki nga gikatahong nag-amok ang napusilan sa mga polis nga miresponde dihang sulay unta niining tigbason ang usa kanila diha sa Brgy. Apo lungsod sa Argao kagahapon sa buntag.

Ang napusilan patay mao si Isidro Fuentes, usa ka mag-uuma ug giingong adunay problema sa pangisip gumikan sa paggamit og ilegal nga drugas, base sa nakuhang impormasyon sa kapolisan.

Samtang ang nakapusil kaniya mao si Police Officer 2 Howard Maynopas, sakop sa alert team sa Argao Police Station.

Kini ang gitug-an ni Sr. Insp. Alejandro Batobalonos ang hepe sa Argao Police nga nahinabi sa Banat News alas 10 sa buntag gitawgan sila sa kapitan sa barangay Apo kabahin sa tawong nag- amok.

Sumala pa ni Batobalonos nga unang gibuak ni Fuentes ang samin sa multicab sa barangay ug nanghagis sa lugar nga nagbitbit og sanggot.

Duna sa’y duha ka mga residente sa maong dapit nga naila nga sila si Jr ug Raymond nga naglimpyo sa inihaw nga baboy sa suba ang gipangtigbas ni Fuentes apan nakalikay human nangambak sa tubig.

Daling miresponde sila si PO3 Jose Palmero ug PO2 Howard Maynopas ug ilang naabtan si Fuentes sa sulod sa ilang balay nga padayong nanghagis hinungdan nga ila kini nga gi-estoryahan aron mokalma.

Apan pipila ka minutos ang milabay kalit lang kini migawas ug nagbitbit og sanggot dayong ingon “Imo g’yod kong sukdon?” dayon hata og tigbas sa polis.

Sigun pa ni Batobalonos miatras si Maynopas apan natumba hangtod nga naabtan kini sa suspek apan naunhan pagpusil sa gidala niya nga M16 Rifle ug naigo sa dughan si Fuentes nga milapos sa iyang likod.

Daling gidala sa Argao District Hospital si Fuentes  apan nakabsan kini sa iyang kinabuhi. Gawas sa sanggot nakuha sa hawak ni Fuentes ang usa ka tigib ug gunting.

Ang inahan ni Fuentes nga si Luz nga nahinabi ni Batobalonos mikompirmar nga mosuolsuol ang sakit sa iyang anak ug mahadlok silang matulog sa ilaha.

Gitug-an sa hepe nga igo rang naghimo sa ilang trabaho ang iyang mga sakop. (BANAT NEWS)