Tulisan tipi sa mga pulis

CEBU, Philippines - Napatay sa mga sakop sa City Intelligence Branch (CIB) sa Cebu City Police office ang usa ka suspetsadong tulisan human nakigpinusilay kanila diha sa Brgy. Carreta sa miaging gabii.

 Ang namatay naila nga si Joel "Pawikan" Conseja, nagpuyo sa Blessed Sacrament Church sa Brgy. Tejero, sa dakbayan sa Sugbo.

Sumala pa nga nagpatrolya sila si Police Officers 2 Kenneth John Gacquit ug PO2 Diosdado Lunday sa maong dapit  dihang ilang nakit-an ang usa ka Zusie Villanueva, 30, taga Brgy. Camputhaw nga naghilak nagpakitabang kanila kay gitulis kini sa duha ka armadong lalaki nga nagbiseklita ug gikuha iyang pitakang adunay P150 nga kwarta.

Daling niresponde sila si Gacquit ug Lunday ug gidala ang biktima sakay sa usa ka pribadong sakyanan ug ilang naapsan sa karaang White Gold Club building ang mga suspek nga positibong gitumbok sa biktima.

Dihang gisitar sila sa mga polis ug gimandoan nga pahunongon wala maminaw ang duha ug mibunot na hinuon sa iyang armas ang usa sa mga tulisan apan naunhan kini pagpusil sa mga polis.

Patay diha-diha dayon si Conseja, apan ang iyang kauban tulin kaayong nidagan. Narekober sa mga polis ang usa ka kalibre .45 nga pistola ug ang bisekleta nga gigamit sa duha. Base sa imbestigasyon sa Theft and Robbery Section ug sa City Intelligence Branch nga ang duha ka tulisan nalambigit sa pipila ka pagpamusil patay ug pagpanulis sa maong lugar. (BANAT NEWS)