100 balay nasunog

CEBU, Philippines – Kapin sa usa ka gatos ka panimalay ang naugdaw sa duha ka sunog nga miigo sa dakbayan sa Sugbo ug sa Mandaue kagahapon sa buntag ug sa hapon.

Naugdaw ang kapin sa 60 ka balay sa duha ka sitio sa Bamboo Village sa Barangay Basak-Pardo sa dakbayan sa Sugbo kagahapon sa buntag nga nagbilin og P600 mil nga danyos.

Si Cebu City Fire Marshall Rogelio Bungabong Jr., miingon nga nadawat ang alarma sa alas 9:50 sa buntag ug giisa sa Task Force Alpha ug nakontrolar paglabay sa usa ka oras.

Matud pa ni Bongabong nga nagsugod ang sunog sa ikaduhang andana sa balay ni Sophea Valdozamo.

Ang mga molupyo sa maong lugar miingon nga bata nga nagduwa og posporo o ba kaha lighter ang hinungdan sa maong sunog.

Daling mikatap ang sunog tungod sa kakusog sa hangin, sikit ang mga balay nga ginama sa light materials. Nakadugang pa g’yud ang kahuot sa dapit ug walay dalan alang sa mga bombero.

Nasamad sa  tiil ang usa ka bombero nga miresponde sa alarma.

Sa laing susamang insidente, mokabat sa P1.1 milyon ang gibiling danyos sa sunog nga nahitabo sa Zone Batong, Zone Talong ug Zone Camanse, Barangay Paknaan, sa Mandaue nga milanat og 30 ka minutos.

Si Senior Fire Officer 2 Cefriano Codilla nga imbestigador sa Bureau of Fire Protection (BFP)  miingon nga ang kalayo nagsugod sa panimalay  nga gipanag-iya sa usa ka “Ronavie”  nga dali kaayong mitapon sa mga silingang panimalay nga pulos ginama sa mixed-materials ug nadanyos ang laing tulo.

Sa laing bahin, gipapriso sa iyang mga ginikanan ang 20-anyos nga si Francisco Glova human niini gisunog ang ilang balay sa Sitio Kinyangan, Barangay Sta. Felomina lungsod sa Alegria sa nakalabay nga gabii. Matud pa nga hubog si Glova nga miabot sa ilaha ug nakig-away sa igsuong babaye ug dihang gibadlong gipaak niini ang amahan ug pagkahuman gilabay niini ang lamparilya hinungdan sa pagkasunog sa ilang balay  apil ang ilang inani nga sinakong mga mais. – Jojo C. Ugdol ug Donahmae Gadugdog, NSU Intern  /EIM) (BANAT NEWS)