3 langyaw girapido

CEBU, Philippines - Usa ka langyaw ang patay ug laing duha ang naangol human sila gipangtadtad og bala sa gibanabanang tulo o upat ka mga lalaki diha sa sulod sa usa ka fastfood chain sa  Barangay Tabunok sa Dakbayan sa Talisay alas 4:20 kagahapon sa kaadlawon.

Ang namatay naila nga si Henry Haffner, 31, usa ka German national ug kasamtangan nga nagpuyo sa barangay Tisa dakbayan sa Sugbo.

Samtang ang mga naangol naila nga sila Julian Millard, 31, French national ug Cheten Saparaiya, 32, Indian national nga pulos nagpuyo sa barangay Pooc dakbayan sa Talisay.

Matud pa sa hepe sa Talisay City Police Office, Superintendent Reycel Carmelo Dayon nga nahinabi sa Banat News nga personal nga kalagot ang ilang gitan-aw karon nga motibo sa maong krimen.

Sumala pa ni Dayon nga dako ang posibilidad nga naamong ug naalaan lang nga kauban ang German national sa laing duha ka langyaw hinungdan nga naapil sa pagpusil ug mao pa hinuoy napatay.

Sa imbestigasyon sa kapulisan misulod sa maong food chain si Millard ug Saparaiya kauban ang usa ka babayeng Filipina ug nangaon.

Matud pa nga dunay duha ka mga lalaki nga nagkaon sa sulod nga mibugal-bugal sa Indian national.

“Pag-order pa lang og pagkaon sa Indian gibinuangan na daw sila kay nangita man siya og pagkaon nga naa’y onions, misamot pa pag- ingon nga “Dili pa utang, dili pautang,”matud pa ni Dayon.

Giingong makasabot og binisaya ang Indian maong nakigtinubagay kini sa duha hinungdan nga giulang sila sa gwardiya ug nanggawas ang duha ka lalaki  samtang nipadayon sa ilang pagkaon ang Indian ug ang French uban sa babaye. Dangtan pila ka gutlo miabot usab ang German nga si Haffner kauban ang iyang hinigugmang Filipina aron mopalit og pagkaon nga ilang dad-on sa biyahe padung sa Oslob.

Apan sa dayon niini og gawas, nasugatan niya ang mga gunmen nga diretso dayong mipusil sa iyang bukton hinungdan nga mikaratel kini og dagan balik sa sud ug misaka sa second floor aron motago, apan gigukod kini ug didto gitiwasan sa sud sa bodega.

Ang laing kauban sa duha ka gunmen pagkakita  nila ni Saparaiya ug Millard nga nalansang sa gilingkoran tungod sa hitabo, giapil usab sa pagpusil.

Dunay nakuhang footage ang close circuit television (CCTV) sa mga dagway sa mga mamumuno ug  gipangita na sila karon.

Nasagmuyo usab si Dayon human niya nasayran nga way armas ang gwardiya sa maong kan-anan, ug gani miuna kini og tago pagsugod og butobuto.

Nakuha sa kapulisan sa crime scene ang 16 ka basiyo sa .9mm nga bala, lima ka basiyo sa .45 kalibreng bala, upat ka slug sa .40 pistol, 11 ka deformed slug sa wala pa matino nga kalibre sa armas, pito ka deformed lead core sa wala pa matino nga  bala ug usa ka deformed nga bala. (Jojo C. Ugdol/EIM)(BANAT NEWS)