Lalaking natulog gipusil patay
CEBU, Philippines - Patay ang usa ka lalaki nga gipusil samtang natulog sulod sa ilang panimalay tapad iyang asawa diha sa Sitio Pugay, Barangay Sta. Cruz, Lungsod sa San Francisco, isla sa Camotes.
Sumala pa ni Senior Police Officer 2 Jose Argalon sa San Francisco Police Station , usa ka Federico Ramirez, 52, ang nipahibalo kanila kalabot sa maong pagpamusil sa maong lugar.
Si Argalon kinsa usa sa miresponde sa dapit miila sa biktima nga mao si Jovito Nodalo, kinsa nakabaton og duha ka samad pinusilan sa ubos sa iyang tiyan.
Wala pay kasayoran ang kapolisan kun si kinsa ang mamumuno ug kun unsay motibo niini.
Dali unta kining gidala sa Ricardo Maningo District Hospital apan gideklarar nga patay na.
Ang asawa sa biktima nga si Andresa miingon nga nakurat na lamang kini nga sa iyang pagmata nga nagkadugo na ang iyang bana nga naghigda tapad kaniya. (BANAT NEWS)
- Latest
