Ex-convict gipusil patay sa guwardiya
CEBU, Philippines – Patay ang usa ka ex-convict human pusila sa usa ka kanhi tanod ug karon guwardiya sa construction company sa sitio Mag-Alambac, Mantalongon, lungsod sa Dalaguete.
Ang biktima naila nga si Alejandro Cartilla, 66, samtang ang suspek naila nga si Rosendo Remedio, 32, pareho nga nagpuyo sa maong lugar.
Matud ni PO2 Reynaldo Vidas, desk officer sa Dalaguete Police, nga nag-abot sa maong lugar ang duha pasado alas 7 sa gabii ug kalit lang gipusil sa suspek si Cartilla. Igo sa nagkadaiyang parti sa lawas ang naangkon ni Cartilla hinungdan sa iyang kamatayon. Sumala pa ni Vidas nga posibleng duna’y personal nga kasuko si Remedio ni Cartilla. Si Remedio ang dali sab nga nisibat human sa hitabo. Samtang sa lungsod sa Dumanjug, patay ang 26-anyos nga lalaki human pusila sa wala pa mailhing mamumuno niadtong nakalabay nga gabii sa Barangay Tubod-Bitoon. Ang biktima naila nga si Danilo Layan, ulitawo ug nagpuyo sa maong lugar.
Sumala pa ni PO3 Dionesio Tagopa sa Dumanjug Police Station nga duna na’y rekord sa barangay ang biktima gumikan sa pagpabadlong ilabina kung mahubog. Matud ni Tagopa nga taud-taud na nga wala nauli sa ilang lugar ang biktima nga gikatahong nagtrabaho sa dakbayan sa Sugbo. Niadtong nakalabay nga gabii usa ka buto sa armas ang nadungog ni Vicente Marco, 54, apan wala lang gitagad ug buntag na nga nakita sa mga silingan nga nagbuy-od na sa yuta ang patay nga lawas ni Layan nga duna’y igo pinusilan sa likod nga nilapos sa dughan.
Sigun pa ni Tagopa nga sa patay nga lawas ni Layan ilang nakuha sa bulsa ang duha ka puso sa mais. Sila nagduda nga posibleng gikuha sa biktima ang maong mga mais dihang iya kini’ng nalabyan sa dalan ug posibleng nakit-an sa tag-iya hinungdan nga gipusil. Hinuon wala pa’y matumbok ang kapolisan kung kinsa ang nihimo sa krimen. – /GMR) (BANAT NEWS)
- Latest
