68-anyos gigulgol

CEBU, Philippines – Patay na nga nakita ang usa ka 68-anyos nga lolo nga usa ka mananggiti diha sa sapa sa Lower Barangay Maghaway, dakbayan sa Talisay niadtong nakalabay nga adlaw, ang biktima gigulgol ang liog ug wa nay sapot.

Ang biktima naila nga si Agustin Fernandez, nagpuyo sa maong lugar, samtang gitudlo nga suspek sa krimen naila nga si Donnamae Pardillo nga silingan ra ‘sab sa biktima.

Matud pa ni Senior Police Officer 1 Benjamin Sebellita ang imbestigador sa Homicide Section sa Talisay City Police Station nga nahinabi sa Banat News katapusang nakita ang biktima niadtong Biyernes sa hapon,

Wala na kini nabalik sa ilang balay hinungdan nga ang iyang anak nga si Rosemarie ang mitaho sa kapulisan sa pagkawala sa iyang amahan.

Sa gihimo nga imbestigasyon sa kapulisan, tulo ka mga batan-on ug duha niini mga minor de edad ang mitug-an nga ilang katapusang nakita ang biktima kauban si Pardillo paingon sa sapa niadtong Biyernes sa hapon.

Matud pa ni Sebellita tungod sa kakuryoso sa tulo ka mga batan-on, ilang gisundan ang duha diha sa sapa ug ilaha silang gilili, matud pa nakita nila nga naghagwa-hagwa ang duha apan mibiya sila sa lugar kay nahadlok sa biktima tungod kay duna kini dalang sanggot.

“Wala na daw sila nakakita og nganong namatay kay paghagwa hagwa pa lang milakaw na sila kay naa daw dalang sanggot ang biktima,” matud pa ni Sebellita.

Domingo na sa hapon sa dihang nadiskubrehan ang patay nga lawas sa maong lolo didto sa lugar nga wala na’y sapot sa lawas ug duna’y samad sa iyang liog.

Ang kapulisan nagduda nga basin og ang sanggot ra ‘sab sa maong tigulang ang giabis  sa iyang liog. Wala pa nila  makita ang sanggot apan ang sakoban nabilin diha sa crime scene.

Dali ‘sab nga nasikop sa kapitan sa barangay si Pardillo ug gihatod sa kapulisan.

Sa interogasyon sa kapulisan hugtanong mihimakak ang babaye sa pasangil ug kini mihimakak  nga nagkuyog sila sa namatay.

Apan si Sebellita miingon nga posibleng mamahimong lig-on nga testigos ang tulo ka mga batan-on nga miingon nga sila ang katapusang nakita didto sa crime scene.

Hinoon wala sab gipadaplin sa kapulisan ang posibilidad nga duna’y laing tawo nga mihimo sa maong krimen ug kini karon ang ilang gisubay samtang gitanggong na sa karsel sa Talisay City Police Station ang batan-ong babaye. – /EIM) (BANAT NEWS)