Kapolisan, media nanghatag regalo sa VSMMC

CEBU, Philippines - Nanaygon ang kapolisan kauban sa mga sakop sa media sa mga pasyente’ng mga bata sa Vicente Sotto Memorial Medical Center kagahapon sa buntag.

Ang grupo gilangkuban sa mga opisyal sa kapolisan sa rehiyon, probinsiya ug dakbayan sa Sugbo, mga alumni sa Philippine National Police Academy (PNPA) ug Defense PNP Press Corps (DEPP). Ang kapolisan ug media ang nanghatag og regalo ngadto sa mokabat 120 ka bata human gikantahan og awit sa Pasko. Kapin 20 ka mga opisyal sa kapolisan ang nikuyog lakip sa kapin napulo ka sakop sa media.  Si Julieta Gonzaga nga taga Bairan, Naga City ug duna’y anak nga 10-anyos nga na-admit sa tambalanan gumikan sa problema sa kidney ang nipadayag sa iyang kalipay ug pagpasalamat sa pagduaw kanila. Matud ni Gonzaga una’ng higayon nga sila nakadawat og regalo nga gikan pa gyud sa mga polis ug sa media ug duna pa’y kanta.

Samtang si Gregoria Silbano nga taga lungsod sa Badian nga duna’y anak nga 9-anyos nga dili makabarug halos usa ka semana na nga anaa sa tambalanan ang nahimo sab nga emosyonal sa dihang kini naduaw sa mga nanaygon nga polis ug media.

Iyang pangandoy nga makagawas na sila sa tambalanan aron maghiusa sila sa ilang panimalay sa pagsaulog sa Pasko. Si Supt. Arnel Banzon, deputy chief for operations sa Cebu City Police Office, miingon nga upat na ka tuig ang nakalabay sa dihang ulahing nakahatag og regalo sila sa mga bata.

Si Supt. Rodolfo Albotra usab nipasabot nga igo lang sila mihatag og regalo isip paghatag sa uban sa grasya nga ilang nadawat. “At least sharing man lang sa blessing nga nadawat nato sa Ginoo all year round, seguro mao pud ni ang right time nga maka-share ta sa mga kabataan,” matud ni Albotra.

Gipadayag ni Albotra nga gawas sa material nga nahatag nila sa mga bata unta ang paghatag og awit sa Pasko sa mga polis ug sa media makahatag og kadasig sa mga bata ug sa ilang ginikanan nga dili mo-surender sa mga problema nga ila karon nga giatubang.  (BANAT NEWS)