Tindera’g saging gisabligag’g mantika

CEBU, Philippines - Gidakop sa kapolisan ang usa ka sidewalk vendor human gireklamo sa kauban nga misablig kaniya sa nagbukal nga mantika niadtong Miyerkules sa buntag sa Don Gil Garcia Street, Capitol Site, dakbayan sa Sugbo.

Ang gisikop naila nga si Rheynalyn Canteveros, 24, samtang ang reklamante naila nga si Jerame Panginahug, 25, kinsa nakaangkon og second ug third degree burns sa iyang nawong, wala nga kamot ug tiil human sila nagkatinubagay sa iyang silingan nga vendor. Matud ni Chief Insp. Wildemar Tiu, hepe sa Fuente Police Station, nga gipakita sa biktima sa ilang buhatan ang mga paso nga naangkon niini sa iyang lawas.

Si Panginahug niingon nga nasuko kaniya si Canteveros nga namaligya og piniritong saging sa lugar human naninda sab siya og samang baligya sa tupad.

“Nasuko man na siya sir ngano kuno’ng giparehasan nako siya og tinda og saging,” matud ni Panginahug.

Gipasabot sab sa biktima nga kaniadto namaligya siya og pagkaon nisunod sab niya og baligya ang suspek apan wala kini niya gikasuko.

“Ako sa una sir naninda ko og pagkaon iya sad ko nga giatbangan wala gyud ko masuko, pero karon nga naninda ko og saging suko kaayo na siya,” dugang pa ni Panginahug.

Nagsugod ang lalis sa duha human nitubag si Panginahug ni Canteveros human kini giingnan nga palayason sa maong lugar.

“Giingnan man ko niya sir nga palayason kuno ko niya, papahawaon sa akong pwesto, nagkalalis mi sir,” saysay pa sa biktima. Apan pipila ka minutos ang nakalabay kalit lang gikuha sa suspek ang kaha nga duna’y nagbukal nga mantika ug gisablig kini sa biktima gumikan sa kalagot. Dali nga gidala sa Cebu City Medical Center (CCMC) aron patambalan ang mga paso nga naangkon sa biktima ug niadto sa buhatan sa kapolisan.

Nasikop sa kapolisan ang suspek ug pwerteng hilak samtang nangayo og pasaylo sa hitabo apan ang biktima ang gikataho’ng wala’y plano nga mopasaylo bisan pa og panahon pa sa Pasko. Gitanggong na sa Fuente Police Station si Canteveros nga nag- atubang og kaso’ng physical injuries. (BANAT NEWS)