Amahan nagpusil patay

CEBU, Philippines - Gituohang naghikog ang usa ka mag-uuma nga napalgang patay na pinaagi sa pagpusil sa iyang kaugalingon sulod sa ilang panimalay kagahapon sa tungang gabii sa barangay Pili, dakbayan sa Danao.

Si PO3 Nelson Pantoja sa Danao City Police Station miila sa namatay nga si Reynaldo Martil Giba, 44-anyos, minyo.

Nasayran nga ang namatay kauban sa duha ka anak nga lalaki nagkasabot nga mag-inom human sa ilang panihapon.

Gitug-an sa mga anak sa namatay nga nag-una sa pagsulod sa ilang lawak ang ilang inahan kauban sa gamay pa nila’ng manghud ug nahinanok na sa pagpangatulog.

Tunga’ng gabii human sa ilang panag-inom sila nag-iyahay sa pagpanghigda samtang ang ilang amahan misulod na sab sa lawak  nga gikatulgan sa ilang inahan ug ilang manghud.

Si Pantoja miingon nga sa paglabay sa pipila ka gutlo kalit lang nilang nabati ang lanog nga buto sa armas nga nakapapugwat kanilang tanan sulod sa panimalay.

Dihang gisusi, nahingangha na lang sila’ng tanan nga nahagba na sa sawog ang ilang amahan nga naligo na sa kaugalingong dugo ug  samad pinusilan sa tuong tampihak hinungdan sa kamatayun.

Hinuon wala gisalikway sa kapolisan ang katahap nga posibleng naaksidente sa kaugalingong armas ang biktima. Tupad sa patay’ng lawas sa mag-uuma nakaplagan ang 22 rifle nga armas uban sa usa ka slug niini. (BANAT NEWS)