Metro Cebu ikatulo sa daghang HIV/AIDS

CEBU, Philippines - Ikatulo ang Metro Cebu sa adunay daghang kaso sa AIDS sa nasud base sa labing ulahing survey.

Gibutyag sa pangulo sa Human Life International, Dr. Rene Josef Bullecer, nga nitaas og 87 porsiyento ang mga tawong nataptan og HIV/AIDS sa Pilipinas sukad 2008 hangtud sa Nobiyembre ning tuiga.

Sa kinatibuk-ang 19,986 ka pasyente, 6.3 porsiyento ang Metro Cebu.

Ang Metro Manila gihapon ang may labing taas nga porsiyento nga 63, gisundan sa Angeles City nga adunay natalang 9.4 porsiyento ug ikatulo ang Metro Cebu.

Gibutyag ni Bullecer nga base sa pagtuon, 70 porsiyento sagad nga mga bag-ong nataptan sa AIDS kadtong mga lalaki nga nakighilawas sa isigka-lalaki.

Nasuta nga ang Sugbo nitala sa labing unang dapit nga daghan nataptan sa AIDS tungod sa paggamit og ginadiling drugas pinaagi sa pag-inject dayun gisundan sa dakbayan sa Mandaue.

Ang mas nakapasubo karon matud ni Bullecer nga ang mga nabiktima sa AIDS nagkabata mao nga giusab nila karon ang pamaagi sa pag-edukar sa mga tawo labot sa AIDS.

Kun kaniadto ang mga tinun-an lang sa kolehiyo ang ilang gipasabot ug gihadlok sa dala sa sakit nga AIDS, sugod sunod tuig ilakip na ang mga tinun-an sa high school.

Dugang ni Bullecer nga base sa pagtuon nga kasagaran nga  hinungdan kun nganong nagkabata ang nataptan sa sakit nga AIDS tungod sa kakuwang sa pagtagad ug paggiya sa mga ginikanan, kuwang sa kahibalo sa maong sakit ug ang kasayun sa access sa technology diin sila daling makakita sa mga pornographic scene.

Nagkagamay hinuon ang mga namatay sa maong sakit tungod sa tambal nga HIV Anti-Retroviral Therapy.  (BANAT NEWS)