Tinun-an gidagit sa ‘tomboy’

CEBU, Philippines - Gipangita karon sa kapolisan ang 19-anyos nga tinun-an sa Verallo Foundation College Incorporated sa dakbayan sa Bogo nga gituohang gidala sa wala masayri nga lugar sa usa ka 37-anyos nga gidudahang tomboy.

Ang gipangita mao si Ferlie Epe Castillote nga anak ni Julieta Epe Castillote sa barangay Taytayan sa maong dakbayan kinsa mao’y nitaho sa kapolisan niadtong Nobiyembre 8 sa gabii.

Matud sa hepe sa kapolisan sa Bogo, Supt. German Mallari, nga gitug-an sa inahan nga ang iyang anak nga si Ferlie ala una pa sa hapon sa maong adlaw nga nawagtang.

Asoy sa inahan nga niadtong Hunyo, ang Mormon Single Adult Group adunay kalihukan sa lungsod sa Sta. Fe, Bantayan.

Usa sa ilang mga sakop ang giduol sa usa ka Alma Joy Enriquez Guinto, 37-anyos nga usa ka person with disability nga lumad nga taga San Manuel, Tarlac ug temporaryong nagpuyo sa Taytayan, dakbayan sa Bogo ug nangutana labot sa venue sa sunod nilang kalihukan.

Matud ni Julieta nga samtang gipahigayun ang kalihukan sa maong dapit, si Alma Joy kalit lang mitumaw ug ilang namatikdan nga si Ferlie ang gisigehan sa pagsud-ong.

Si Alma Joy gihatagan og pagkaon ug apartment sa Mormon Church sa sitio Mondragon, barangay Taytayan.

Sanglit nag-inusara kini sa apartment, si Alma Joy nihangyo kang Julieta nga kuyogan sa anak sa apartment tungod kay wala kini kauban.

Gibalibaran unta apan si Ferlie ang ni-insister nga iyang kuyugan si Alma Joy sa apartment tungod sa kalooy sa kahimtang nga may kabilinggan sa panglawas.

Human sa usa ka semana, gipapauli na unta si  Ferlie apan gipugngan ni Alma Joy kinsa mihulga nga maghikog kun biyaan.

Giasoy sa inahan nga may gipaila-ila si Alma Joy sa Facebook nga iyang pag-umangkon nga si Daniel Denver Ignacio nga giingong adunahan ug nakagusto kang Ferlie.

Niadtong Nobiyembre 6 nahiuli sa ilang panimalay si Ferlie apan kuyog si Alma Joy ug mipahibalo nga moadto sa Cebuana Lhuillier sa pagkuha sa kuwarta nga gipadala sa iyang boss.

Matud pa ni Julieta nga sukad niadtong adlawa si Ferlie wala na nila igkita lakip na usab si Alma Joy ug dili na usab makontak ang cellphone niini. (Romeo T. Limpangog/GMR)(BANAT NEWS)