CEBU, Philippines - Gipasusi ni Gob. Hilario Davide III ang mga fishing vessels nga nasakmit panahon sa pagdumala ni Loy Madrigal sa Provincial Anti-Illegal Fishing Task Force nga giingong nangawagtang.
Gitahasan ni Davide ang bag-ong hepe sa task force, Romeo Tapayan, nga mopahigayon og imbentaryo sa mga nasakmit nga fishing vessels.
Gikataho nga dunay duha ka fishing vessels nga nasakmit sa lungsod sa Liloan apan nahanaw.
Sa milabay’ng buwan duha ka fishing vessels usab nga gipundo sa Daanbantayan ang nawagtang.
Gani si Mayor Augusto Corro nanawagan sa ahensiyang hingtungdan sa pagpahigayon og imbestigasyon.
Si Tapayan sa iyang bahin nagkanayon nga duna siya’y gitahasan sa pag-adto sa Bureau of Fisheries and Aquatic Resources (BFAR) aron mangayo og tabang sa pagpangita niadtong nawagtang nga fishing vessels sa Daanbantayan. Sa Liloan, si Tapayan nag-imbestigar na usab sa maong taho. (BANAT NEWS)