P2.7B budget sa Mandaue aprobahan

CEBU, Philippines - Gikatakdang ipasar sa konseho sa dakbayan sa Mandaue ang P2.7 bilyones nga budget alang sa sunod tuig. Kini mas daku bali og P900 milyones kaysa P1.8 bilyones alang niining tuiga.

Sa niaging sesyon, gipasabot ni Konsehal Diosdado Suico kinsa maoy chairman sa committee on budget nga angayan na aprobahan ang giduso nga budget ni Mayor Jonas Cortes sanglit natuki na kini sa finance committee.

Ang budget naglakip sa P2.5 milyones nga general fund; P113 milyones nga 20% development fund ug P68.9 milyones nga operasyon sa public market.

Ang ihawan gigahinan usab og P16.8 milyones samtang ang Mandaue City Hospital adunay P47.8 milyones; Mandaue City Sports Complex adunay P6 milyones. (BANAT NEWS)