29-anyos nga amahan“gikulata” namatay

CEBU, Philippines - Nakabsan sa iyang kinabuhi samtang gitabang sud sa tambalanan ang usa ka 29- anyos nga lalaki nga gidudahang gikulata ug nakita na lang sa iyang amahan nga naghigda sa iyang lawak nga daw sa wala na na’y panimuot didto sa Sitio Langub, Barangay Kalunasan ning dakbayan sa Sugbo.

Ang biktima naila nga si Jeffrey Dave, usa ka laborer, duna’y ka live-in partner ug usa ka anak nga nag-abang sa usa ka lawak sa maong lugar.

Matud pa ni Senior Police Officer 1 Ruth Violango ang imbestigador sa Homicide Section sa Cebu City Police Office nga nahinabi sa Banat News ang amahan sa namatay nga si Joselito mitug-an nga nalabyan niya ang lawak sa anak.

Nadunggan niya ang 4-anyos nga apo nga babaye nga naghilak maong misud siya sa lawak ug nakita niya ang iyang anak nga si Jeffrey nga naghigda ug wala na maglihok.

Dihang iyang gipukaw wala kini momata hinungdan nga dali nila nga gidala sa Vicente Sotto Memorial Medical Center (VSMMC).

Diha sa sulod sa tambalanan nabantayan sa inahan sa biktima nga duna kini bun-og sa suwang ug daw sa napangos ang tuhod niini mao nga nagduda sila nga gipasipad-an kini og laing tawo. Apan nianang pagkasunod adlaw (Sabado) namatay si Jeffrey.

Sa imbestigasyon sa kapulisan nasuta nga gikan nakig-inom si Jeffrey sa mga silingan nianang Biyernes diha sa ilang lugar.

Gipaabot nila karon ang autopsy sa medico legal kun duna bay foul play sa nahitabo kang Jeffrey.

“Naa na tay persons of interest, pero ato sa paabuton ang resulta sa autopsy aron makasuporta sa impormasyon nato,” sigun pa ni Violango. (Jojo C. Ugdol/EIM)

Balay  naugdaw tungod sa kandila

Naugdaw ang duha ka andanang panimalay nga ginama sa mixed materials sa Barangay Magay, Compostela tungod sa nataligam-an nga gidagkotan nga kandila.

Si Senior Fire Officer  2  Tomas Pinas sa Compostela Fire Station miingon nga gipanag-iya sa magtiayong Teofilo, 69, ug Rufina Corpus, 65,ang maong panimalay.

Matud pa ni Pinas nga nagdagkot og kandila ang magtiayon nga gipahimutang sa altar sa ikaduhang andana apan nataligam-an kini sa pagpawong.

Lakip sa miresponde ang mga bombero sa Liloan ug dakbayan sa Danao apan naugdaw g’yud ang balay. Wa hinuon kini makatapon sa silingan pa nga kabalayan.

Si Pinas miingon nga milungtad g’yud sa usa ka oras ug tunga ang ilang kumbate sa kalayo.

Mukabat sa P100,000 ang kantidad sa gibiling danyos sa maong sunog ug wala’y gikatahong naangol o kinabuhing nakalas atol sa maong hitabo. (BANAT NEWS)