Top makapatagam sa mga drayber?
CEBU, Philippines – Daghan pa gihapon ang mga kolorum nga mga sakyanan nga magbiyahian sa dakbayan sa Mandaue bisan gihingusgan na sa Traffic Enforcement Agency of Mandaue (TEAM) ang pagdakop niini. Kini ang gibutyag mismo sa mga traysikol drayber ug mga operators nga sakop sa Pinagkakaisang Samahan ng mga Tsuper at Operators Nationwide (PISTON) ngadto kang Edwin Ermac, operation chief sa TEAM.
Matud sa mga drayber nga ilang namatikdan nga daghan na nga mga kolorum nga traysikol nga nadakpan sa operasyon sa TEAM apan natingala sila kay pipila lang ka oras human sa pagdakop mobalik na usab kini og biyahe.
Gipasabot ni Ermac nga dali kaayong malukat sa mga operator ang madakpan nila nga kolorum nga traysikol tungod kay P500 man lang ang multa. Matud ni Ermac nga kasamtangan pa nilang gipaabot nga ang Land Transportation Office mohatag og Temporary Operators Permit (TOP) ngadto sa ilang mga traffic enforcers kay dinagko na man ang multa niini.
Sumala pa ni Ermac nga daghang madakpan sa ilang operasyon tungod kay magbalhin-balhin man ang dapit nga ilang adtoon sa adlaw ug gabii.
Giklaro ni Ermac nga wala’y makahatag og pasiunang pahibawo kung asa ang ilang operasyon sanglit himoon nila sa kalit nga paagi ug did-an ang mokuyog sa pagdala og cellphone. - /GMR (BANAT NEWS)
- Latest
