Mga pushers sa probinsiya nasikop

CEBU, Philippines- Gisikop sa kapolisan ang tulo ka gidudahang drug pushers sa nagkalainlaing lugar sa probinsiya sa Sugbo diin ubay-ubay’ng drugas ug armas ang nasakmit.

Sa lungsod sa Alegria, kapin sa P60 mil nga kantidad sa drugas ang nasakmit gikan sa usa ka Ronelo Legarde atol sa ronda sa kapolisan alas 5:30 niadtong Lunes sa gabii.

Matud ni PO1 Lenard Cabahug sa Alegria Police Station nga dugay na nila’ng  gipaubos sa monitoring ang suspek human sila nakadawat og report may labot sa ilegal nga negosyo niini.

Nakuha sa kapulisan ang 1 ka big size nga putos sa drugas nga kantidad og P63 mil, usa ka medium size ug pito ka small packs, duha ka P200 bill ug walo ka P100 bill.

Gawas sa drugas nakuha usab sa kapolisan ang usa ka .22 revolver, siyam ka bala, 14 ka basiyo, unom ka bala sa .38 revolver, usa  ka bala sa 357 ug lima ka bala sa 9mm pistol.

Gitanggong na sa karsel sa kapulisan sa maong lungsod ang suspek nga pasakaan og kaso sa drugas ug armas.

Sa dakbayan sa Carcar, gisikop sa kapolisan si Rodelio Apura nga taga sitio Anunang, Liburon kinsa giingong notadong tigpayuhot og drugas sa lugar.

Pinangulohan sa hepe sa Carcar Police Station, Supt. Teodulfo Manatad, ilang gisulod ang  panimalay ni Apura ug nakuha ang mga drugas nga tulo ka medium size, 13 ka small packs ug 17 ka abli na nga small plastic sachet.

Taud-taud na nga gipanid-an si Apura sa ilegal nga kalihukan sa drugas hinungdan nga gikuhaan og search warrant human nga nagpositibo ang test buy.

Samtang nasakmit usab sa kapolisan ang duha ka dagkung paketeng shabu ug siyam pa ka gagmay dihang gironda ang panimalay sa usa ka gikatahapang pusher sa Daan Lungsod, Catmon alas dos pasado sa hapon niadtong Lunes.

Si Insp. Jose Villarin, hepe sa kapolisan sa maong lungsod, maoy nangulo sa pagpangronda. Nunot sa pagkasakmit sa maong gidaghanon sa shabu maoy ilang nadakpan ang suspetsadong pusher og shabu nga si Walter Socalid, nga nagpuyo sa maong dapit.

Dugang nadakpan nila ni Inspector Villarin mao sila si Sonny Herodias ug Rafael Dumanog nga pulos hingkod ang panuigon nga didto sulod sa panimalay ni Socalid nga gidudahan usab nga nagsuyop ug nakuhaan usab og mga drug paraphernalia.

Ang mga dinakpan gikatakdang pasakaan og tukmang kaso. - /GMR) (BANAT NEWS)