Pildero sa hantak nanghasi
CEBU, Philippines - Usa ka lalaki nga napildi sa hantak nag-wild ug nagbahis-bahis samtang nagdaladala og armas, suspek gidakop sa mga sakop sa Guadalupe Police Station diha sa Sitio Sto. Niño, Barangay Banawa, kagahapon sa hapon.
Giila ang dinakpan nga usa ka Rogelio Tomnod, alyas Roger, 52, nagpuyo sa maong lugar nga nagdala og paltik nga .357 revolver nga may sud nga lima ka bala.
Matud pa ni PO1 Alfredo Casas, desk officer sa Guadalupe Police Station nga nahinabi sa Banat News dunay mitawag kanila tungod kay dunay armadong lalaki nga nag-wild sa maong lugar. Giingong pwerteng sukoa sa suspek kay napildi kini sa hantak.
Dali ‘sab gilayon nga miresponde ang upat ka mga polis ngadto sa maong lugar diin ila nga naabtan ang suspek nga nagbitbit pa sa iyang revolver ug nangita pa og away. Apan sumala pa human nga nakakita og polis si Tomnod mitahan kini dayon ug mihatag sa iyang dala nga revolver, pakyas siya pagpakita og lisensya niini hinungdan nga kini gidakop.
Matud pa sa dinakpan nga igo lang gibilin sa iyaha ang maong revolver ug iya lang sab kini nga gidala. (BANAT NEWS)
- Latest