Nagdala’g armas sa polis gisikop

CEBU, Philippines - Usa ka lalaki ang nadakpan sa kapulisan  sa checkpoint human nakuhaan og pistola ug lisensya sa armas apan nahibaw-an nga dili diay iya kadto sa usa ka polis nga taga Bohol nga miprenda niini kaniya.

Ang checkpoint anha gihimo sa Borromeo Street sa Barangay  Ermita ning dakbayan sa Sugbo nga miresulta sa pagkasikop ni Ralph Ian Lerio, 27, taga Barangay Calamba, ning dakbayan.

Nakuha gikan kaniya ang usa ka .45 caliber Norinco pistol nga dunay magazine nga may unom ka bala, apan sa pagsusi sa gipakita niining lisensya sa armas, dili diay kadto iya. Ang armas iya diay ni PO1 Jurith Barotil, nga taga Mocpoc, Loon, Bohol kinsa giingon nag-awol (Absent Without Official Leave) sa serbisyo samtang nadestino kini sa Calape, Bohol.

Si Sr. Insp. Noel Lomente ang hepe sa Carbon Police Station nagkanayon nga base sa ilang imbestigasyon, giingong mi-check in sa usa ka lodge ang maong polis sa may downtown area  apan nahutdan kini og kwarta hinungdan nga gi-prenda niini ang iyang armas sa tag-iya sa lodge ug gidala sab kini sa suspek nga anak sa tag-iya paingon unta sa ilang balay.

Matud pa ni Lomente nga mo-expire ang lisensya sa maong armas karong Hunyo 16, 2014.

Sa pagsubay nga gihimo sa Banat News sa Loon Bohol Police Station, ang hepe sa maong buhatan nga si Sr. Insp. Jacinto Mandal mitug-an nga nadestino kaniadto sa Loon Police Station ang maong polis, apan gibalhin sab kini sa Calape Police Station gumikan sa dili maayo’ng performance. Duna sa’y gihawiran nga special report si Mandal pinermahan June 14, 2013 nga nagmando nga “drop from the rolls” ang maong polis sa hepe sa Calape Police Station. (BANAT NEWS)