Duha naigo sa kilat

CEBU, Philippines - Nagisi-gisi ang sinina, nawad-an sa panimuot ug nakaangkon og mga paso sa kalawasan ang usa ka babaye ug ang kauban niini human sila giingong naigo sa kilat sa Babag Proper, Barangay Babag II  ning dakbayan sa Sugbo, kagahapong adlawa, atol sa pagbundak sa kusog nga ulan.

Ang mga biktima giila nga sila si Aireen Cabingatan, 23, mag-uuma ug Roel Villaso, 37, mag-uuma, pulos nagpuyo sa maong lugar.

Sumala pa sa report sa Brigada News FM kagahapon, si Villaso miingon nga pasado alas-10 sa buntag nangguna sila sa uma dihang nabantayan nila nga hapit na mobundak ang ulan maong nangita sila og kapasilongan.

Apan sa ilang paglakaw usa ka kusog nga kilat ang  miigo  kanila hinungdan sa ilang pagkalagpot.

Matud pa ni Villaso nga si Cabingatan maoy naduol-duol sa giagian sa maong kilat ug nawad-an og panimuot ug nagisi-gisi na ang sinina ug dunay  mga paso sa lawas. Bisan og nagpanglipong si Villaso nilakaw siya ug nangayo og tabang sa mga silingan sa maong lugar.

Dali gilayon nga gihatod sa Vicente Sotto Memorial Medical Center (VSMMC) ang duha nga kasamtangan nga giatiman sa maong tambalanan.

Sa pagkutlo ning balita wala pa nasayri ang kahimtang ni Cabingatan nga gihulagway nga kritikal ang kahimtang. (/EIM)(BANAT NEWS)