Suspek sa masaker mitahan

CEBU, Philippines - Kamingaw sa iyang pamilya ang hinungdan nganong natintal sa pag-ikyas ang kanhi security guard nga suspek sa “Fair Bank Massacre” nga si Berly Tudtud gikan sa prisohan sa Bureau of Jail Management and Penology-Medellin adtong Huwebes sa buntag.

Apan duha ka adlaw human sa iyang pag-ikyas, si Tudtud, 39, minyo ug taga Sitio Laray, Barangay Bungtod, Bogo City, mi-surrender  kang PO1 Loliboy Terana kagahapon sa buntag uban sa iyang igsuon diha sa usa ka abandonadong bodega sa katubhan nga gipanag-iya ni Dr. Lepatan sa Barangay Pulambato.

Si Terana taga Barangay Pulambato apan nadestino kini isip Cebu Provincial Public Safety Company sa Borbon Police Station. Matud ni Chief Insp. Hermano Mallari, hepe sa Bogo City Police Station, nga alas 9:00 sa buntag kagahapon giubanan si Tudtud ni Terana ngadto sa ilang buhatan uban sa igsuon niini nga si Luvimyn Tudtud-Suson.

Sa pagkakaron si Roger Lagahit nalang ang nagpabilin nga gawasnon ug padayong gipangita sa Provincial Investigation and Detective Management Branch.

Matud ni Mallari nga si Tudtud midiretso sa balay sa iyang igsuon human kini mieskapo ug naabot siya mga alas 7:00 adtong Sabado sa gabii. Mitug-an si Tudtud kang Mallari nga didto siya magtago-tago sa katubhan anang buntag ug mogawas lang og gabii. Mga tubo na lang pud iyang gikaon kung gutomon.

“Kitkit lang kuno siya og tubo unya gabii ra iyang lihok aron kuno di siya masakpan,” dugang ni Mallari.

Si Tudtud nag-atubang og kasong robbery with homicide human iyang gi-shotgun ang kaubang gwardiya nga si Dean Deserto, 26, kapuyo ni Deserto nga si Cecilia Torre, 30, ug accounting clerk sa Fair Bank nga si Jenelyn Megabon, 26, taga-Medellin.

Gikuha usab niya ang P80,000 nga cash sa steel cabinet sa bangko ug milayas apan nasikop ra usab siya sa PIDMB. Si Tudtud ug Roger Lagahit nakit-ang nanglayat sa paril sa BJMP samtang nagpahigayon og sunning ug exercise anang buntaga.

Ang duha migamit lang og kahoy nga maoy ilang posibleng gitikangan samtang nagtinabangay sa pagkatkat sa paril nga bisan gani ang compound PNCO nga si JO1 Reynald Hinogin wala makamatikod sa pag-eskapo sa duha. Si Supt. Rodulfo Albotra Jr., PIDMB chief, mipadala na og tracking team sa pagpangita kang Roger Lagahit, nga adunay kasong attempted murder.(/EIM) (BANAT NEWS)