Level 3 nga pusher sa Carcar nakuhaan og shabu ug armas
CEBU, Philippines - Daghan’g pinakete nga shabu nga gibana-bana’ng mokantidad og P30 mil ug mga armas ang nasakmit sa mga sakop sa intelligence branch sa Cebu Provincial Police Office (CPPO) atol sa buy-bust operation nga ilang gihimo didto sa Barangay Perelos, Carcar City sa miaging Domingo sa gabii.
Nadakpan sa mga polis ang gikatahapan nga drug pusher nga mao si Elanito “Lani†Quijano, 52, ug residente sa maong lugar ug wala na makasukol pa sa mga operatiba human g’yud sa transaksyon.
Nasakmit gikan ni Quijano ang 19 ka gagmay, upat ka medium-size ug usa ka dakong pakete sa shabu, mga drug paraphernalia, digital weighing scale, improvised shotgun nga adunay pito ka bala, .38 kalibre nga revolver, .22 kalibre nga revolver, ug ang P500 nga marked money.
Ang mga nasakmit nga drugas gidala sa PNP Crime Laboratory Service-7 sa Camp Sotero Cabahug alang sa chemical analysis samtang ang mga armas gisumitir usab alang sa ballistics examination.
Si Quijano gipailawom og surveillance sulod sa tulo ka semana sa wala pa ang operasyon mga alas sayes sa gabii didto sa iyang panimalay. Dali siyang gisikop human niya madawat ang P500 nga marked money bugti sa usa ka pakete nga shabu.
Matud ni Sr. Insp. Leo Logroño, team leader sa kapolisan, nga wala makasukol si Quijano kay ang iyang armas didto man gipatong sa lamesa. Si Quijano giingon nga usa ka “level three†nga drug pusher sa maong lugar.
Ang ngalan ni Quijano anaa usab sa drug watch list sa Carcar City Police Station. Matud sa kapolisan nga si Quijano nakumbikto na kaniadtong 1985 sa kasong murder hinungdan nga nabilanggo siya sa New Bilibid Prisons sa Muntinlupa City ug nakagawas adtong 1998.
Karon lang tuiga nagsugod sa pagpamaligya og shabu si Quijano nga miani og reklamo sa mga residente. Ang kapulisan mupasaka og kaso batok sa dinakpan nga may kalabotan ang pagpamaligya, paghupot og shabu, ingon man ang pagtiner og armas nga walay lisensya. (/RUB)(BANAT NEWS)
- Latest
