Sikyu gitabangan og dunggab sa tulo namatay

CEBU, Philippines - Patay ang usa ka security guard nga gitabangan og dunggab sa tulo ka wa mailhing lalaki samtang naglakaw kini padulong uli agi sa SRP Road sa barangay Mambaling pasado alas 7:00 sa miaging gabii. Ang biktima naila nga si Adonis Gungob, 27, security guard sa Top Match Security Agency ug nagpuyo sa barangay Labangon sa dakbayan sa Sugbo.

Base sa imbestigasyon sa Homicide Section sa Cebu City Police Office nga ang biktima ug ang iyang kauban nga gwardya nga si Jason Baron nagkuyog pauli gikan trabaho ug diha sila milusot sa SRP Road sa Mambaling.

Apan kalit lang may miatang kanila nga tulo ka wa mailhing lalaki ug midunggab sa biktima sud sa pipila ka higayon. Tungod sa kahadlok ni Baron nga siya na sab ang isunod mikaratil kini og dagan ug mitawag sa kapolisan.

Una nga mirespondi si SPO2 Rene Sebes ug ang iyang mga kauban sa Mambaling Police Station apan wa na diha ang mga killers. Patay na usab si Gungob dihang gihiling sa Basak Pardo Emergency Response (BPER), duna kini mga samad sa iyang wala nga dughan ug tuo nga bahin sa iyang buko-buko.

Si Baron mitug-an sa kapolisan nga pasado alas 5:00 sa wala pa mahitabo ang insidente nagkalalis ang biktima ug usa ka construction worker nga nagtrabaho sulod sa site nga ilang gibantayan.

Matud pa sa pamahayag ni Baron nga gisitar ni Gungob ang maong tawo tungod kay nagdala kini og kahoy sa iyang paggawas sa maong site. Padayon pa ang imbestigasyon sa kapolisan sa pag-ila sa mga responsabli sa kamatayon sa biktima. (BANAT NEWS)