LBC Branch sa Mandaue gitulis kay walay gwardya

CEBU, Philippines - Ang LBC Branch sa Barangay Taboc, dakbayan sa Mandaue giusban pagtulis kagahapon sa buntag tungod kay wala gihapon kini mikuha og gwardya bisan og gitulis na kaniadto.

Nag-helmet ang nag-inusara nga tulisan nga mihold-up sa 23-anyos nga kahera nga si Evet Consultado nga nagkurog nga mitunol sa P5 mil lang nga kwarta diha sa iyang kaha. Matud ni PO3 Heracleo Gamboa, sakop sa Presinto 3 sa Mandaue City Police Office (MCPO), nga ang tulisan nagpatuo nga magpadala siya og kwarta apan kalit lang mition og .45 kalibre nga pistola kang Consultado. Matud sa polis nga paggawas sa tulisan nagdali kini nga miangkas sa motorsiklo nga gimaneho og laing tawo nga nagpaabot lang didto sa unahan. Ang LBC Taboc Branch  gitulis na sa  miaging tuig apan nadakpan  ang duha  nga nanulis. - /RUB (BANAT NEWS)