Sakyanan sa pag-ambus ni Archival nagpa-carwash sa Cebu City

CEBU, Philippines - Usa sa mga sakyanan nga gigamit pag-ambus kang Atty. Noel Archival nagpa-carwash sa Cebu City usa ka adlaw human sa ambush didto sa Coro, Dalaguete, nagpasad nga basiyo sa mga bala sa sud sa sakyanan gipalimpyohan nila sa mga carwash boys. Ang Special Investigation Task Group Archival mipagawas na sa identities sa duha ka mga tawo nga gituohang adunay kalambigitan sa pagpusil patay kang Archival ug sa duha ka mga kaubanan niini sa habagatang bahin sa Sugbo duha ka semana na ang nakalabay.

Ang duha ka mga lalaki sakay sa gray-colored nga Toyota Hi-Lux nga matud pa gipa-carwash sa Cebu City. Apan letrang “K” lang ang nahinumdoman sa mga carwash boys sa plaka niini.

Matud pa ang usa gihulagway nga mga 37-anyos, mga 5’3 ngadto sa 5’4 ang gitas-on, slim, fair complexion, adunay alom sa ubos sa ilong, nagsul-ob og shades, adunay ariyos sa walang dunggan, ug dunot ang duha ka ngipon niini sa atubangan.

Si Supt. Rodolfo Albotra, hepe sa Provincial Intelligence Branch, mibutyag nga mao kini ang drayber sa sakyanan ug maoy misugo sa mga carwash boys sa pagdispatsar sa  basiyo sa bala sa M16 Armalite Rifle sulod sa sakyanan.

“Naklaro siya kay nanaug man kuno ni sa sakyanan unya maoy nagsugo nga ipa-dispose ang mga bala (basiyo),” matud ni Albotra. Ang usa gihulagway usab nga anaa sa 30- anyos, taas ang buhok, adunay bungot, dakuon ang mata ug dakuon ang lawas. Naglingkod kini tapad sa drayber.

Si Albotra midugang nga aduna pay galingkod sa luyo apan wala na kini maklaro sa carwash boys. Ang maong mga lalaki nagpahugas sa sakyanan sayo sa buntag human sa pagpusil patay kang Archival ug kaubanan niini sa Barangay Coro, Dalaguete. Apan nalabay na sa mga carwash boys ang mga basiyo sa M16 nga ilang gihipos gikan sa sakyanan ug gisubay karon sa mga imbestigador ang mga junkshops kay posibleng nabaligya kini.

“Buntag the next day nagpa-carwash unya gilabay ang mga empty shells sa basurahan pero anang udto na na-report sa amo wa na diha ang basura,” dugang ni Albotra.

Matud pa  niya nga interesado ang mga carwash boys nga moabag sa kapulisan sa maong imbestigasyon. (/EIM)(BANAT NEWS)