Board ug Bar topnotchers gantihan

CEBU, Philippines - Gusto karon sa duha ka konsehal sa siyudad sa Sugbu nga pahatagan og ganti ang mga  taga Cebu City nga mamahimong topnotchers sa board ug bar examinations agi pag-awhag sa mga tinun-an nga maningkamot sa ilang pagtuon. Ang konseho mitugyan niini ngadto sa Committee on Laws sa gisugyot nga  ordinansa niadtong Miyerkules paghatag og ganti ug pasidungog sa mga topnotchers sa Professional Regulations Commission (PRC)  licensure examinations and Bar examinations.

Sila si Konsehal Hanz Abella ug Mary Ann Delos Santos maoy misugyot sa maong ordinansa.

Apan di hinuon tanan ang makadawat sa maong prebilihiyo tungod kay kinahanglan nga sila mga botante sa siyudad, lumad nga Sugbuanon o kaliwat og usa ka Cebuano ug dili badlungon sa katilingban.

Kadtong makapasar ug mo-top sa Physician’s board ug Bar examinations, ang top one makakuha og P100,000, samtang ang ikaduha ngadto ikalima nga pwesto adunay hatagan og P25,000 ug P15,000 usab matag passers nga nakalangkat sa ikaunom ngadto ikanapulo nga pwesto.   Ang mga mopasar sa PRC licensure examinations sa ubang kurso  ang top one hatagan og P50,000, ang ikaduha ngadto ikalimang pwesto dunay P25,000 ug P15,000 alang niadtong mga passers nga nakakuha sa ikaunom ngadto ikanapulo nga pwesto.             Ang maong ordinansahon nag-ingon nga ang pundo nga gamiton anha kuhaon sa annual budget sa siyudad.

Ang mga topnotchers makadawat usab og plaque of recognition sa adlaw sa kasaulogan sa charter day sa siyudad matag Pebrero 24. (/EIM)(BANAT NEWS)