Pagpamutol og pagatpat ipa-imbestigar
CEBU, Philippines - Giawhag ni Provincial Board Member Jude Thaddeus Sybico ang kadagkoan sa Department of Environment and Natural Resources (DENR) nga ipa-imbestigar ang pagpamutol og mga pagatpat didto sa Barangay Unidos, San Francisco, Camotes.
Si DENR-7 Executive Director Isabelo Montejo giawhag nga mohimo dayon og pakisusi kay gatosan ka mangroves sa baybayon sa Barangay Unidos ang gipangputol ug gikahadlokan nga makapaminus kini sa mga isda didto sa maong dapit.
Nahibaw-an hinoon nga si San Francisco Mayor Aly Arquillano miisyu na og kamandoan ngadto ni Pacito Relampagos nga ihunong ang pagpamutol sa mga kahoy nga pagatpat ug ubang kahoy nga mitubo sa dagat.
Apan ang report nga ang cease and desist order nga giisyu sa mayor wala hatagi og pagtahod ni Relampagos kay matud pa nangangkon kini nga aduna siya’y Memorandum of Agreement (MOA) ug sa mga opisyal sa DENR.
Si Relampagos nangangkon nga giisyohan siya og Special Use Agreement in Protected Areas kon (SAPA) sa DENR kaniadtong Enero 14 alang sa pagpalambo sa mao nga lugar.
Matud ni Board Member Sybico nga nakita niya nga gipangputol ang mga pagatpat ug iyang gitan-aw nga nakasupak kini sa "Shoreline Protection, Mangrove Rehabilitation and Bathing Establishment.â€
Iyang giawhag ang DENR-7 nga kanselahon ang kasabotan nga gipirmahan nila ug ni Relampagos. (/RUB)(BANAT NEWS)
- Latest
