9 ka livelihood association gihatagan og puhonan sa pagtapos sa tuig 2013

CEBU, Philippines -  9 ka livelihood association gihatagan og puhonan Sa pagtapos sa tuig 2013, adunay 59 ka mga livelihood associations sa Sugbo ug Negros Oriental ang nakadawat og pinansyal nga hinabang gikan sa Department of Social Welfare and Development sa Central Visayas (DSWD-7) pinaagi sa Sustainable Livelihood Program (SLP) niini.

Matud pa ni Kerwin Macopia, usa sa mga tigpamaba sa DSWD-7 nga adunay kinatibuk-ang P24,729,397.50 nga pundo ang gipagawas sa miaging tuig nga igahin alang ngadto sa giila nga mga livelihood associations.

"Naglaom kami nga pinaagi niining livelihood assistance, makasugod na mo sa inyong kaugalingong negosyo ug sa kadugayan pauswaga ang inyong panginabuhi," kini matud pa usab ni DSWD-7 Regional Director Mercedita Jabagat atol sa pagpanghatag sa mga tseke  didto sa social hall sa Cebu City Hall. Sumala pa ni Macopia nga sa syudad sa Sugbo, ang matag benepisyaryo makadawat og tag P10,000 ug  ila  kining  monitoron  pag-ayo.

Apan si Macopia nagkanayon nga ang maong pinansyal nga hinabang gikinahanglang bayran sulod sa duha ka tuig ug nga gawas sa syudad sa Sugbo, ang DSWD-7 mihatag usab og tseke ngadto sa mga grupo sa lungsod sa Bantayan, Tuburan, Pinamungahan, Badian ug San Fernando ug lakip na sa syudad sa Carcar. Gisaysay ni Macopia nga ang mga asosasyon sa mga munisipalidad sa Negros Oriental gihatagan usab og hinabang pinansyal nga  naglakip sa  Zamboangita, Siaton, mga syudad sa Bayawan, Canlaon, Tanjay ug lungsod sa Pamplona diin matag usa niining maong dapit gihatagan og nagkadaiyang livelihood training ug mga pasilidad nga mamahimo nilang magamit alang sa ilang pagbansay ug aktuwal nga produksyon.

Gibutyag ni Macopia nga kining maong programa ubos kini sa Bottom-Up Budgeting (BUB) approach diin ang Local Govenment Unit (LGU) mag-andam og proposal nga may kalambigitan sa mga panginahanglan sa kalungsoran ug siyudad sa pagpalambo ug usab ilhon ang tagsa-tagsa ka lokal nga poverty reduction action plans. (BANAT NEWS)