13 mil ka senior citizen sa Mandaue nahatagan sa ilang cash assistance
CEBU, Philippines - Nadawat na sa 13,000 ka mga senior citizen sa 27 ka barangay sa dakbayan sa Mandaue ang dugang P1,000 nga pinansiyal assistance sa kagamhanan niadtong miaging adlaw.
Ang maong kantidad maoy dugang sa unang P1,000 nga pinansiyal nga hinabang nga gihatag sa kagamhanan niadtong miaging Mayo niining tuiga.
Si Mayor Jonas Cortes maoy nangulo sa pagtunol ngadto kanila nga gipahigayon sa Mandaue City Sports and Cultural Complex sa sitio Tribunal sa barangay Centro sa maong dakbayan.
Mitambong sa distribusyon sila si Bise Mayor Glenn Bercede ug kauban usab niya ang tanang sakop sa konseho nga naglakip sa chairman sa committee on senior citizens sa konseho sa maong dakbayan si Konsehal Nenita Layese, Konsehal Diosdado Suico, Konsehal Emmarie Lolipop Ouano-Dizon, Konsehal Elston Dabon, Konsehal Jiffy Ceniza, Jimmy Lumpas ug Konsehal Editha Cabahug.
Si Nedy Senes sa Office of the Senior Citizen Affairs (OSCA) sa maong dakbayan ug Benjamin Gahi nga maoy pangulo sa kahugpongan sa mga Senior Citizen sa kabarangayan ang lakip usab sa mitambong sa maong kalihokan,
Si Roger Paller nga nahinabi sa Banat News miingon nga gipahibalo sa mayor nga dugangan pa gyud og laing P1,000 ang pinansiyal nga tabang aron mahimo na kining P3,000. (BANAT NEWS)
- Latest