Jail warden gisuwaya’g hostage

CEBU, Philippines - Gisuwayan pag-hostage si Jail Warden   Chief Inspector Gil Inopia  sa Talisay City Jail  sa usa ka binilanggong German national ug may usa ka polis nga  naangol atol sa linayogay   kagahapon sa buntag.

Ang naangol  mao  si SJO1 Joven Dalman , hingkod , samtang  ang  suspetsado mao si Thomas Michael Ruhland, 39, German national napriso sa kasong paglapas sa Akta Republika 9208 ug Akta Republika 7610 kon human trafficking ug child abuse.

Sa imbestigasyon nila ni SPO1 Mikie Espina, SPO1 Yvonne Illustrisimo ug PO1 Stephen Sefuesca giingong ang suspetsado mihangyo   nga makig-istorya sa jail warden   bahin sa problema sa iyang ngipon.

Samtang  nag-istorya sila  kalit lang gitionan sa suspetsado ang Jail Warden sa improvised knife niini dayong tunol sa papel nga  adunay suwat. Sa maong suwat giingong si Ruhland mimando kang Inopia nga hatagan siya og usa ka pistola nga adunay duha ka mga magazine nga puno sa bala.

Hinuon maayo  na lang  kay nakabantay sila  si SJO1  Dalman ug SJO1 Rey Larida, kinsa  maoy nurse sa  TCJ,   busa nadis-armahan  ang suspetsado.

Atol sa linayogay si Dalman nasamdan  sa iyang kumingking  ug gidala ngadto sa Talisay City District Hospital. Nabawi  sa mga jail officer gikan  ni Ruhland ang mga improvised knife niini nga naglangkub sa nail pile, tin can cover, nail cutter nga dunay lansita ug can opener.

Gibutyag ni Inopia sa  Banat News nga si Ruhland nadakpan  kaniadto sa mga ahente sa National Bureau of Investigation (NBI) ug ang Department of Social Welfare maoy mipasaka sa kaso tungod kay ang giingong biktima sa suspetsado menor de edad.

Si Ruhland napriso  sa Talisay City Jail sa barangay Maghaway niadtong Pebrero 21, 2011.

Gibutyag ni Inopia nga niadtong Martes ang mga bisita ni Ruhland nga mga German  mitunol og suwat  kang Inopia bahin  sa problema sa suspetsado sa iyang ngipon.  (BANAT NEWS)