Pintor natagak gikan sa 3rd floor patay
CEBU, Philippines - Patay ang usa ka pintor human kini matagak gikan sa ikatulong andana sa building nga iyang gipintalan niadtong Biyernes sa hapon diha sa sitio Laray, barangay San Roque, dakbayan sa Talisay.
Ang natagak giila nga si Noriel Flores, 23, lumad nga taga Dingli, dakbayan sa Iloilo.
Sa gipahigayong imbestigasyon nila ni Inspector Rogene Fudotan si Flores gi-hire kini isip pintor sa JAR nga usa ka sub-contractor nga nagbase sa dakbayan sa Iloilo.
Giingong si Flores niadtong higayona namintal kini diha sa kisame sa ikatulong andana sa usa ka dakung tindahan sa nahisgutang lugar apan naligas ang tiil niini sa gipatungang damba nga hinungdan sa iyang pagkahagbong.
Si Flores dali kining gidala ngadto sa Talisay City District Hospital apan patay na kining naabot sa maong tambalanan. (BANAT NEWS)
- Latest
