Duha napaig sulod sa SUV

CEBU, Philippines - Duha ka mga tawo ang napaig sud sa usa ka SUV didto sa Brgy. Sabang dakbayan sa Danao kagahapon sa kaadlawon.

Hangtod ning pagsuwat sa balita wala pa masayri nila ni PO3 Marlon Remullo ug PO2 Rocelo Campo kung kinsa ang mga luwan sa usa ka SUV Hyundai nga nasunog.

Gisusi pa usab sa PNP Crime laboratory kung babae ba ug lalaki ang naa sud sa maong sakyanan.

Matud pa ni PO2 Campo duha ka bata nga nanguha og kaka mga 1:55 kagahapon sa kaadlawon sa bukirang bahin sa Brgy. Sabang ang nakakita sa nasunog nga sakyanan.

Dali  nila kining gitaho ngadto sa kapolisan ug sa pagresponde didto uban sa mga sakop mga bomber sa  Danao City Fire Station.

Nakontrolar sa kabomberohan sulod sa 15-minutos ang maong sunog apan sa pagsusi pa sud sa maong sakyanan duha ka tawo nga nangapaig ang ilang nakita ug lisod na silang ilhon.

Wala usab maila kun kinsa ang tag-iya sa maong sakyanan kay wala na ang plaka sa maong SUV.

Ang mga patay’ng lawas gidala sa lokal nga punerarya sa Danao alang sa paghiling niini.

Wala pa usab matino sa kapolisan kung gituyo ug naghikog ba ang mga biktima nga napaig sud sa maong sakyanan. (BANAT NEWS)