Babayeng gikan sa Hong kong nadasmagan patay

CEBU, Philippines - Nadasmagan patay  ang  usa  ka babayeng  gikan  sa Hong Kong sa usa ka  motorsiklo  didto  sa barangay Tunga, lungsod sa Moalboal sa alas 9:30 sa miaging gabii.

Ang biktima naila nga si Isabel Dela Peña, 60, molupyo sa maong  lugar.

Samtang ang suspetsado nga  driver  sa motorsiklo naila nga si Allen Cabaron Libato, 24, waiter, silingan  ra  sa biktima.

Matud pa ni PO1 Arnold Sergio nga nahinabi sa Banat News nga ang biktima padulong na unta manihapon  apan  mipalit  pa  unta  kini  og softdrink sa atbang  nilang  tindahan dihang  kalit kining  nadasmagan  sa nagbagiyus  nga sakyanan.

Nasuta  sa kapolisang  miimbistigar  nga  expire na ang rehistro sa maong motor ug wala’y professional  driver’s license ang  suspetsado samtang  ang  iyang  motor wala’y headlight.

Daling  gihatud  ngadto  sa Badian District Hospital ang  biktima  diin  kini  ideklarar  nga  dead on arrival.

Samtang nasikop ni PO1 Kemore Ybas sa 2nd Company sa Regional Public Safety Battalion ang suspetsado ug gidala kini ngadto sa Moalboal Police Station.

Ang anak sa biktima matud pa ni Sergio nga mopasaka gayud og kaso sa suspetsado.

Ang suspetsado natanggong  na karon sa Moalboal Police Station ug   gitakdang pasakaan na og kaso sa piskaliya karong adlawa,  Lunes. (BANAT NEWS)