Duha ka balay naugdaw sa sunog

CEBU, Philippines - Duha ka balay ang hingpit nga naugdaw sa sunog nga miigo sa managlahing dapit sa dakbayan sa Sugbo kagahapong adlawa.

Naugdaw ang balay ni Lorenzo Fernandez sa Villa Remedios, Opra sa barangay Kalunasan sa dakbayan sa Sugbo sa alas 10:42 kagahapon sa buntag.

Base sa imbestigasyon ni SFO2 Daniel Relatado Jr. ang imbestigador sa Cebu City Fire Station nga ang sunog didto magsugod sa ikaduhang andana sa balay ni Lorenzo Fernandez.

Si Lorenzo Fernandez, 54 anyos, tag-iya sa usa ka balay nga nasunog dihang nahinabi sa Banat News miingon nga nabantayan sa iyang anak nga lalaki nga si Louie Fernandez, 26, ang sunog.

“Iya nang nabantayan ngadto nga ang pikas kwarto hayag na kaayo unya nakapanimaho sila (aso) paglingi nila sa kwarto sa akong anak babaye perti nang dakoa sa kayo,” dugang ni Lorenzo.

Si Louie nga nahinabi sa Banat News miingon nga nagsiga na ang kutson sa kwarto sa iyang igsoon nga babaye.

Nadawat ang maong alarma sa kabomberohan sa alas 10:42 ug gideklarar nga   under control sa alas 1 0:49 sa buntag apan naugdaw gyud ang balay ni Lorenzo ug ni Jeffrey Fernandez.

Samtang nasunog sab ang duha ka andana nga balay ni Prima Cantillas sa Barangay Tejero sa dakbayan sa Sugbo pasado alas 4 kagahapon sa hapon.

Matod ni SFO2 Relatado nga nagsugod ang sunog sa ikaduhang andana sa maong balay apan ipaubos pa sa imbestigasyon kun unsay hinungdan sa maong sunog.

Samaran si Michael Ian Inglot sa maong sunog sa iyang walang kamot human kini matagak sa ilang atop apan wala kini magpadala sa tambalanan human nahunaran ug natambalan ang iyang samad sa Philipine National Red Cross.   (BANAT NEWS)