Duha patay sa bangga

CEBU, Philippines - Duha ka mga tawo ang nakalas sa managlahing aksidente sa kadalanan diin usa kanila nabangil sa ilawom sa 10-wheeler truck diha sa may dalan B. Rodriguez sa Barangay Sambag 2, ning siyudad sa Sugbu pasado alas -9 kagahapon sa buntag.

Ang biktima nailhan nga si Jumenil Tungal, 26, molupyo sa Maguikay, dakbayan sa Mandaue kinsa maayong pagkaguba sa iyang ulo tungod sa pagkaligis kaniya sa trak de karga.

Matud pa sa asawa sa biktima nga si Elizabeth nga padung sila sa Vicente Sotto Memorial Medical Center aron ipa-checkup ang iyang bana sa psychiatric ward dihang kalit kining milabang sa dalan ug maayong pagkapunggit sa trak.

Si Antonio Escubella, drayber sa trak de karga nga gipanag-iya sa Atlantic Hardware gikostudiya na sa City Traffic Office Management (CITOM).

Ang mamaligyaay og lansones nga si Garry Tul-id mitug-an nga iyang nabantayan ang magtiayon nga miagi sa iyang tungod ug  luya kaayo ang biktima nga kalit milabang paglabay sa maong trak.

Gihulagway ni Tul-id nga susama sa mi-dive ang biktima ug susama sa gisuyop kini sa truck tungod sa kakalit sa maong panghitabo.

Samtang maayong ka pisat sa usa ka  Samuel Maghanoy, nagpuyo sa barangay Canlumacad sa lungsod sa Santander human kini madasmag sa metal railings  diha sa barangay Liloan, Santander.

Matud pa ni PO3 Anthony Aba nga ang biktima gituohang naka-inom ug gikan kini sa barangay Canlumacad ug padulong sa Poblacion ug kusog ang dagan sa motorsiklo nga iyang gimaniho.

Pag-abot sa biktima sa kurbadahon nga dapit sa barangay Liloan ug tungod sa kakusog sa dagan niini wala kabawi ang maong biktima hinungdan nga nabangga kini sa railings.

Naigo ang ulo sa biktima sa konkreto nga poste ug naigo sab sa ngilit sa railings ang iyang tiyan hinungdan nga naabli kini.

Matud ni Aba nga dunay mga warning signs nga gibutang sa maong kurbada tungod sa kadaghan na sa mga nadisgrasya  sa maong lugar.

“Hilan man gud nang lugara, daghan na ang nadisgrasya diha,” matod pa ni Aba. (BANAT NEWS)