NYC dako'g papel sa ikaayo sa mga batan-on

CEBU, Philippines - Ang National  Youth  Commission (NYC) nanginlabot sa kampanya  sa kagamhanan sa  pagpabakuna  sa mga  kabataan  batok  sa human  papilloma virus (HPV).

Si NYC Assistant Secretary Erwin Andaya mipasabot  sa kamahinungdanon  nga  maluwas  ang  mga  kabataan  gikan  sa sakit  nga kanser     nga  komon  kaayo  sa  mga  babaye  nga hamtong.

Uban  sa kampanya  sa Department of Health  (DOH) ug  sa Department of Education (DEpEd) pagsalbar  sa  mga  batan-on  batok  niining  sakit  nga  makamatay, si Andaya  nagkanayon  nga  sila  ang miila  sa  mga  kabataan  nga  nagtungha  sa tunghaang  publiko  sa Sugbo  nga  angay unahon  sa pagpabakuna  niining HPV.

Ang  mga  tinugyanan  sa DOH nagkanayon  nga ang  bakuna sa HPV moepekto lamang  sa  mga  batan-on  nga  wala pay  kasinatian  sa buhat  sa  mga  hamtong

Gani  miingon  si Andaya  nga  gumikan  sa kamahal  ning  maong tambal maglisud  ang  mga  ginikanan  sa  pagpabakuna  sa ilang  mga anak. Maoy  hinungdan nga  sa kahingawa  sa MSD,  milihok kini sa  pakiglambigit  sa DOH  aron  makatabang  sa  mga  kabus  nga  kabataan.

Ang matag dosage  kon tulpok sa HPV  mogasto  og P4,000  kapin   ang  kagamhanan  apan  libre  kini  nga  di pabayran  sa  mga  benepisyaryo  nga  mga  kabataan.

Ang  mga  ginikanan gipadad-an  una  og  suwat  sa  taga  DepEd  kun  mosugot ba silang  bakunahan  ang  ilang  mga  anak og HPV.

May  mga  ginikanan  nga  misupak  nga  bakunahan  ang  ilang  mga  anak  ug  wala  kini  pugsa  sa taga  DepEd.

Sa bahin  sa NYC, si Andaya  nagkanayon  nga dako kaayo  siya  og  kalipay  nga  gipatuman  ang  pamakuna  sa HPV dinhi  sa Sugbo  ug  nanghinaot nga ikapatuman  usab  kini  sa tibuok  nasud. (BANAT NEWS)