Gakson ang mga patay
CEBU, Philippines - Mga technical divers nga misawom sa nalunod nga M/V St. Thomas Aquinas diha sa kadagatan sa Lawis Ledge usahay makiggakus sa mga minatay didto ilawom sa dagat.
Mao kini ang gibutyag ni Engr. Elbert “Bong†Ebo, manager sa Cosmopolitan Funeral Homes nga maoy gihimong morgue sa mga patay’ng lawas nga naugkat gikan sa nalunod nga barko.
Matud ni Ebo nga gitug-anan siya sa pipila ka technical divers nga dili kalikayan nga makiggakus sila sa mga patay’ng lawas nga ilang makit-an aron kini mapagawas gikan sa gamay’ng agianan sa barko.
Gipasabot sa mga technical divers nga tungod sa gihimo sa mga divers angayan gyud sila nga pasidunggan kay maisip sila nga mga “living heroes†nga miserbisyo bisan og walay sweldo pag-ugkat sa mga patay.
Pagka karon hinoon gihunong pa ang pagpangita sa mga patay’ng lawas didto sa ilawom sa barko kay ang giuna nila mao ang paghabwa sa tanang asiete nga gikarga sa barko aron dili makahatag og peligre sa kalikupan.
Sukad sa pagsugod sa recovery operation, miabot na og 116 ka patay’ng lawas ang naugkat apan aduna pay 22 ka tawo ang gipangita pa og gituohang nadala sa barko sa ilawom sa dagat.
Gitug-an ni Ebo nga basi sa “autopsy†sa mga patay’ng lawas nahibaw-an nga dili tanan sa mga biktima namatay sa pagkalumos. Matud ni Ebo nga nasayran nga ang uban namatay kay nabuak ang bagul-bagol, nangabali ang bukton ug mga paa.
Gituohan nga ang kusog kaayo nga impak sa pagbangga sa M/V Sulpicio Express Siete ngadto sa barko sa 2Go Shipping maoy hinungdan nga naparuk ug nangabali ang mga bukton ug paa sa ubang pasahero.
Samtang gibutyag usab ni Ebo nga daghang mga kwarta ug alahas ang nakuha gikan sa mga patay’ng lawas ug atua kini sa mga sakop sa Disaster Victim Identification nga ubos sa Scene of the Crime Operations (SOCO)-Manila.
Matud ni Ebo nga dunay usa ka namatay’ng pasahero nga nakuhaan og duha ka bandol nga linibo nga kwarta nga tua karon sa mga sakop sa SOCO-Manila apan ang tanan girekord. Gawas sa kwarta, duna pa’y mga alahas. (BANAT NEWS)
- Latest
