Batan-on gipusil patay sa silingan

CEBU, Philippines - Patay ang usa ka lalaki human kini gipusil sa iyang silingan pasado alas 7:00 sa miaging gabii diha sa sitio Kalubihan barangay San Nicolas dakbayan sa Sugbo. Ang biktima nailhan nga si Catalino Alcontin, 39, molupyo sa maong dapit samtang ang gitumbok nga suspetsado mao ang nailhan lang sa ngalang 'Van-van.'

Sa pasiunang imbestigasyon sa kapolisan nasayran nga ang biktima nagbarog-barog daplin sa dalan   dihang miduol ang suspek ug mipusil sa dughan sa biktima.

Human sa maong panghitabo gikatahong yano lang kaayong misibat ang mamumuno samtang ang biktima patay usab diha-diha dayun.

Ang kapolisan sa Homicide Section, padayun pang mipahigayon og halawom nga imbestigasyon kalabot sa maong insidenti kini aron masuta ang motibo sa pagpamusil.

Kasamtangan usab nga gipangita sa kapolisan ang suspek. (BANAT NEWS)